– Ulttyq qurama sapyna 16 jasymda óttim. Ol kezde quramanyń bas bapkeri qyzmetin Vadım Prısıajnıýk atqaratyn. Aǵaıymyz bizdi rıngte tóreshi qolyńdy kótermese «jeńdim» dep daýlaspa dep úıretti. Byltyr Taılandta ótken Azııa chempıonatynyń jartylaı fınalynda ózbek boksshysyna ese jiberdim. 1-raýndta bes tóreshi de meniń basym qımyldaǵanymdy baǵalaıtyn shyǵar dep paıymdadym. Biraq kerisinshe, 2,3-raýndtarda ony qýyp júrip soqqy darytqanymmen de tóreshiler jeńisti soǵan jazdy. Buıyrǵany qola júlde boldy.
Oljas Sáttibaevqa uzatylyp, shańyraq qurǵan soń 14 jyl sporttan qol úzdim. Osy jyldar ishinde 5 bala ómirge keldi. Kenje qyzymyz shırap, es kirgen soń ákem Baýyrjan Asqarovtyń assıstenti bolyp bapkerlikke bet burdym. Biraq ózim de áli qajyr-qaıratymdy synap kórsem degen ishki baılamym Azııa chempıonatyna qatysýyma sebep boldy. Ár jekpe-jekke shyǵyp bara jatqanda óńim emes, túsim sekildi sezindim. Bes balany ómirge ákelip, birneshe jyl úzilisten keıin qaıta túlep, babyma ený múmkin emesteı kórinip edi, deıdi batyr ana.
Áıgerim tuńǵysh qyzy men oǵan tete uldy ómirge ákelgennen keıin qolǵabyn qaıta kıedi. Tipti olımpıadalyq 51 kg salmaqta kóshbasshy boldy. Jazǵy Olımpıada dodasynyń joldamasyn oljalaıtyn da oraı týǵan. Biraq joldasy Oljastyń tileýin tilep shańyraǵynda otyryp jankúıer bolýǵa toqtady. Talantty boksshy Oljas Sáttibaev Rıo jazǵy Olımpıadasyna lısenzııa enshilep, tórtjyldyq dodasynda shırek fınalda súrindi.
– Keleshekte qyzdarymnyń biri meniń jolymdy tańdap, boksshy bolamyn dese, betin qaqpaımyn. Byltyrdan bastap áıelder de dýlyǵasyz judyryqtasatyn boldy. Bul budan bylaı soqqynyń aýyrlyǵy da artady degen sóz. Buryn dýlyǵa aıtarlyqtaı qorǵanysh edi, – deıdi boksshy.
Áıgerimniń ákesi Baýyrjan Asqarov – bilikti boks bapkeri. Qyzyn baldyrǵan shaǵynan boksqa baýlypty. Aldymen, qyzdar boksynyń úıirmesi bolmaǵandyqtan, dzıýdo kúresine jiberedi. Biraq boks sportyn qyzdar arasynda da damytý qolǵa alynǵanda, birden osynda aýystyrady. Sodan beri Áıgerim qolǵabyn sheshken joq. Tek kelin atanǵan soń, segiz jyldyq úziliste bes balany ómirge ákeldi.
– Áli esimde, 2004 jyly Afına jazǵy Olımpıadasynyń fınalyna eki boksshymyz shyqty. Gennadıı Golovkın 75 kg salmaqta kúmis medal alsa, Baqtııar Artaev 69 kg salmaq dárejesinde Olımpıada chempıony atandy. Sonda ákem meni qasyna shaqyryp, boksshylarymyzdyń jekpe-jekterin birge tamashalaıtynbyz. 13 jastaǵy oıyn balasy bolsaq ta, boksshylarymyzdyń ár jeńisine erekshe qýanyp, jankúıerlik tanyttyq. Uzaq jylǵy úzilisten keıin sportqa qaıta oralǵanda baıqaǵanym, qyzdar boksynda jańashyldyq artqan. Erterekte bizdi bulshyq etimiz qataıyp ketedi dep, zalda temir kóterýge asa jaqyndata qoımaıtyn. Qazir kerisinshe, fýnksıonaldyq, fızıkalyq daıyndyqqa basa mán beriledi. О́ıtkeni álemde áıelder boksy osyny talap etedi, – deıdi.
2011 jyly turmysqa shyqqanda jeke bapkeri Ermek Ertaev qatty renjipti. Kútpegen jańalyqty estigende abdyrap qalady. О́ıtkeni shákirtin Olımpıada dodasyna qossam dep, baryn salyp ázirlik jasaǵan edi. Biraq keıin aq batasyn berdi. Bes balany ómirge ákelip, uzaq úzilisten keıin qaıta oralǵanda ol kisi de erekshe qýandy.
– Bizdiń úıimiz jattyǵý zalynyń dál irgesinde, qońsylas ornalasqan. Ter sińgen zaldyń aýrasy múldem bólek. Aıaǵym aýyr kezde zaldy saǵynyp, shydamaı jıi baratyn edim, boksshylardyń ázirligin tamashalaıtynmyn, – degen Áıgerim ómirin sporttan tys elestete almaıtynyn jetkizdi.
Byltyr Qaraǵandyda áıelder boksynan «Myqtylar týrnıri» ótti. Sol synǵa Áıgerimniń ákesi Baýyrjan Asqarov ta shákirtterin úkilep ákep qosty. Kópbalaly ana, boksqa qaıta oralǵan Áıgerim de osy týrnırde baq synaýǵa bardy. Rıngke jeke bapkeri Ermek aǵaıy ertip shyqpaqshy boldy. Ákesi de qyzyna sekýndant bolǵysy keletinin bildirdi. Biraq Áıgerim kelisim bermedi. Áke de et pen súıekten jaralǵan adam, qyzynyń qarsy bolǵanyna renjidi.
– Jekpe-jekte jeńiske jetip, rıngten túskende ákemniń qushaǵyna enip kettim. Sóıtip, nege qarsy bolǵanymdy aıttym. Men es bilgen shaǵymnan ákeme qatty jaqyn boldym, erkelep óstim. Bes balanyń anasy bolsam da, áli kúnge ákeme erkeleımin, nazymdy aıtamyn. Eger ol kisi sekýndant retinde rıngke shyqsa men bosańsyp ketýim bek múmkin, múmkin emes-aý, solaı bolatyn da edi. Osyny aıtyp edim renishi basylyp, mańdaıymnan súıdi, – deıdi batyr ana. Jýyrda Bolgarııada ótken «Strandja» týrnırinen boksshylarymyz oljaly oraldy. Úzdikterdiń arasynda kúmis júlde alǵan Áıgerim de bar.
