Sýret: opennews.kz
Bıyl anımasııalyq, derekti jáne oıyn fılmderiniń ártúrli sanattary boıynsha birshama ótinim kelip tústi. Anımasııa salasynda 42 ótinim berilgen. Derekti-hronıkaly fılmder sanatynda 103 ótinim tústi. Oıyn fılmderine keletin bolsaq, 299 ótinim kelgen.
«Qujattardy qabyldaý aıaqtalǵannan keıin Ortalyq ótinish berýshiler usynǵan qujattardy Saraptama keńesiniń qaraýyna engizedi. Ssenarıılerdi nemese ssenarıı josparlaryn Saraptama keńesiniń músheleri fılm túrleri boıynsha seksııalarda qarastyrady. Keńes quramy 20 jumys kúni ishinde basym taqyryptarǵa, sıýjettiń qurylymy men dramatýrgııa qaǵıdattary sekildi basty talaptarǵa nazar aýdaryp, ótinimderdi qarap shyǵady. Ekinshi kezeńde Saraptama keńesi usynǵan jobalardyń qujattar paketi jınaqtalady. Bul rette qate oryn alsa, ony túzeýge 3 kún ýaqyt beriledi», dep habarlaıdy Kıno ortalyǵynyń baspasóz qyzmeti.
Aıta keteıik, bıyl konkýrstyń birinshi kezeńine qatysý úshin ótinim qabyldaý 5-13 naýryz aralyǵynda júrgizildi. Buǵan deıin qańtar aıynda kıno túsirýge arnalǵan basym taqyryptar jarııalandy. Sonymen qatar Kıno ortalyǵy janynan konsýltasııalyq qoldaý sharalary júrgizilip jatyr. Kıno ortalyǵynyń keńsesinde jeke konsýltasııalar, telefon qońyraýlary arqyly suraqtarǵa jaýap berildi, áleýmettik jelide jańa erejege, konkýrsqa qatysty qajetti málimetter jarııalanyp keledi.
