Naýryznama «Samuryq-Qazyna» kompanııalary tobynda keńinen atalyp ótip jatyr. 255 myńnan astam adam jumys isteıtin kompanııanyń iri shaharlarmen qatar, óńirlerdegi bólimderi men kásiporyndarynda qaıyrymdylyqqa, ınklıýzıvti baǵdarlamalardy damytýǵa, mádenı murany saqtap, nasıhattaýǵa baǵyttalǵan is-sharalar ótkizildi. Salt-dástúrler men el tarıhyna qurmet kórsetip, qyzmetkerler ulttyq kıim kıip, qaıyrymdylyq isterine belsendi qatysyp, ult bolmysynyń kórinisi jańǵyrady.
«Naýryz – jańarý men molshylyqtyń, birliktiń rámizi. Bul meıramnyń biz úshin mańyzy zor. Ol qazaq halqynyń qonaqjaılyǵyn, tatýlyǵyn kórsetedi. О́tken kúndi saralap, bolashaqqa jańa maqsattar qoıatyn kezeń. Naýryznama onkúndigi aıasynda birqatar áleýmettik bastamalardy júzege asyrdyq: Astana qalasynda erekshe balalarǵa arnalǵan ınklıýzııa kabınetin, Aqmola oblysynda sport keshenin ashtyq. Muqtaj jandarǵa kómek kórsetý maqsatynda qaıyrymdylyq aksııalary ótip jatyr. Jalpy, kompanııalar toby boıynsha 300-den astam shara uıymdastyryldy», dedi «Samuryq-Qazyna» basshysy Nurlan Jaqypov Naýryz merekesine arnalǵan saltanatty sharada.
Sondaı-aq «Samuryq-Qazyna» toby ekologııalyq jobalarǵa erekshe mán beredi. Máselen, elimizdiń ońtústik jáne batys óńirlerinde «Taza Qazaqstan» respýblıkalyq aksııasy aıasynda 250-den astam aǵash otyrǵyzyldy. Byltyr bul bastama boıynsha 113 myńnan astam jasyl jelek egilse, bıyl taǵy 138 myń kóshet otyrǵyzý josparlanyp otyr. Naýryznama aıasynda qorǵa qarasty kompanııalarda 10 myńnan astam qyzmetkerdiń qatysýymen aldaǵy kúnderi aýqymdy senbilikter ótedi.
Portfeldik kompanııalardyń qyzmetkerleri merekelik sharalardy shyǵarmashylyqpen uıymdastyryp, bir kisideı jumylyp, joǵary deńgeıde atap ótti. Máselen, «Qazaqstan temir joly» ulttyq kompanııasy el boıynsha etnoaýyldar uıymdastyrdy, al jumysshylar balalar úıleri men qarttar úılerine baryp, kómek kórsetti. Al «QazaqGaz» uıymy sheberlik sabaqtaryn uıymdastyryp, betashar rásimin kórsetti jáne «QG Games: Nauryz» sporttyq-zııatkerlik týrnıri men ózge de is-sharalardy ótkizdi.
«Samuryq-Energo» jáne «Kegoc» uıymdary bolsa kıiz úıler quryp, túrli baıqaýlar, chellendjder, ujymdyq merekelik is-sharalar uıymdastyrdy, balalar men qarttar úılerine azyq-túlik, kerekti zattar alyp berdi.
Al «Taý-Ken Samuryq» kompanııasynyń qyzmetkerleri ulttyq sport túrlerinen saıystar ótkizip, qaıyrymdylyq sharalaryna qatysty. «ShalqııaSınk» ujymy Jańaqorǵan aýylynda kıiz úı tigip, aǵa býynǵa qurmetpen eńbek sińirgen jumysshynyń otbasyna baryp, merekemen quttyqtady.
«Qazatomónerkásip» kompanııasy da birqatar qaıyrymdylyq, ekologııalyq jáne mádenı sharalar ótkizdi. Sondaı-aq qurylys salasyndaǵy «Samruk-Kazyna Construction» uıymy ulttyq kıimder baıqaýy men asyq atý saıysyn ótkizip, az qamtylǵan otbasylardyń balalaryna kómek kórsetti.
Osylaısha, Naýryznama onkúndiginiń ár kúninde ótkizilgen is-sharalar ujymdyq birlikti nyǵaıtyp, salt-dástúr, ádet-ǵurpymyz ben tarıhymyzdy qurmettep, óskeleń urpaqqa ónege bolý jolynda mańyzy zor ekenin kórsetip otyr.
Naýryz – kóktem merekesi ǵana emes, el birliginiń, izgiliktiń, jańarýdyń, jańa kezeńniń belgisi. Ulttyq ál-aýqat qory sııaqty iri bıznes qaýymdastyǵynyń áleýmet aldyndaǵy jaýapkershiligi merekeni toılap, qaıyrymdylyq aksııalaryn ótkizýmen shektelmeıdi. Ol ulttyq qundylyqtardy saqtaı otyryp, jańa kózqarastaǵy ádil ári úılesimdi qoǵam qurýǵa baǵyttalǵan júıeli jumysty qamtıdy.
Ásemgúl NURAHMETOVA
