О́ńir basshysy Ashat Shaharov «jaıly mektepterdiń» jaı-kúıimen tanysyp, oqýshylar men olardyń ata-analary, muǵalimdermen kezdesti. Aqjar-2 eldimekenindegi 300 oqýshyǵa laıyqtalǵan mektepke 4-oqý toqsanyna 325 oqýshy qabyldandy. Olar eki aýysymda oqyp jatyr. Mektep ǵımaratynda zamaýı oqý kabınetteri, zerthanalar, IT quzyrettiligin damytýǵa arnalǵan keshender bar. Sondaı-aq eki kompıýterlik kabınet, robototehnıka synyby, STEM-zerthana, sheberhanalar, zamanaýı kitaphana, oqý zaly, kovorkıng alańdary men oıyn alańdary, sport jáne akt zaldarymen jabdyqtalǵan. Mektepte erekshe qajettiligi bar balalardyń oqýyna jaǵdaı jasalǵan.
Ata-ana Aınagúl Sábıteva osy mektepke nemerelerin oqýǵa alyp kelgen. «Mektep ǵımaraty óte ádemi, oqýshylar úshin barlyq jaǵdaı jasalǵan. Nemereme dombyra synyby, qyzdar men er balalarǵa arnalǵan sheberhanalar unap otyr. Bala oqyp qana qoımaı ózi tańdaǵan kásip túrin mektep qabyrǵasynda júrip úırenip shyǵatynyna qýanyshtymyn», deıdi ol.
Turǵyndar kóp shoǵyrlanǵan Eset batyr alabynda boı kótergen №82 jalpy bilim beretin orta mektep 2 myń oqýshyǵa laıyqtalǵan. Munda 55 oqý kabıneti bar. Sonyń ishinde 28 bastaýysh synyp kabıneti, 7 mektepaldy daıarlyq toby, hımııa, aǵylshyn, fızıka, bıologııa kabınetteri, IT, robototehnıka, STEM zerthanalary ashylǵan. Sonymen qatar 440 balaǵa arnalǵan ashana da jumys isteıdi.
«Osyndaı zamanaý bilim ordasynyń salynǵanyna óte qýanyshtymyn. Bilim salasynda kópjyldyq tájirıbem bolsa da, zamanaýı kabınetteri, jaıly demalys oryndary, oqýshyny tulǵalyq damytýǵa barlyq múmkindik qarastyrylǵan jobany birinshi ret kórip turmyn.
Ata-analarǵa mektepti qadirleńizder, muǵalimdermen birge jumys istep, balanyń azamat bolyp qalyptasýyna úlesterińizdi qosyńyzdar degim keledi», deıdi bilim salasynyń ardageri Jánııa Muhambetova.
