Aqpan aıynan qolǵa alynǵan ilkimdi joba aǵashtardy zańsyz kesý oqıǵasyn azaıtyp, tabıǵı resýrstardy basqarýdyń tıimdiligin aıtarlyqtaı arttyrady. «Býrabaı» ulttyq parki orman men ósimdikter álemin qorǵaý, jandandyrý jáne tıimdi paıdalaný bóliminiń basshysy Aleksandr Kovalev ınnovasııalyq joba arqyly tumsa tabıǵattyń kórki – jasyl jelekti saqtaý kúsheıetinin alǵa tartty.
«Maqsatymyz – aǵash kesýdi múmkindiginshe ashyq ári baqylanatyndaı júıege engizý. Barlyq aqparat, derek-dáıek endi aǵashtyń qozǵalysyn basqarýdy qamtamasyz etetin avtomattandyrylǵan biryńǵaı ortalyqqa jazylady. «Bir tal kesseń, on tal ek» degen qaǵıda qatań qadaǵalanady. Otalǵan ár túp aǵashtyń ornyna jas kóshetter egiledi. Qanatqaqty jobanyń nátıjesi de kórinedi. Aldaǵy ýaqytta aǵash kesýdi baqylaýǵa alyp, zańsyzdyqtyń aldyn alýǵa múmkindik beredi», dedi A.Kovalev.
Innovasııalyq qurylǵy «EKO-SET CODIMEX» dep atalady. Joǵary tehnologııalyq quraldar jıyntyǵynda aǵashty belgileýge arnalǵan balǵa, ár aǵashty tirkeýge qajet bırka, tańbalanǵan bırkalarǵa arnalǵan jınaq, aqparatty engizetin, sondaı-aq ony óńdeýge, saqtaýǵa arnalǵan serverlik jabdyq pen planshet (qol skaneri) bar. Budan bylaı ár otalǵan aǵashtan QR kody bar biregeı belgi alynady. Osy kodty skanerden ótkizý arqyly orman ınspektorlary aǵashtyń shyǵý tegin, sanatyn, kólemin, otalǵan kúnin, tasymaldaý derekterine qatysty aqparatty da birden alady. Barlyq aqparat derekqorǵa júkteletindikten, baqylaý isi de aıtarlyqtaı jeńildeı túsedi.
Jobany júzege asyrý úshin ulttyq park qyzmetkerleri «Aǵashty esepke alýdyń biryńǵaı júıesimen» jumys isteýdiń arnaıy kýrsyn oqydy. Ormanshylar men orman sheberleri derekterdi engizý, óńdeý, taldaý daǵdylaryn ıgerdi. Onyń nátıjesin olar kúndelikti jumys barysynda sıfrlyq tehnologııalardy tıimdi paıdalanady.
Qanatqaqty joba orman sharýashylyǵynda sıfrlyq tehnologııalardy engizýdiń bastamasy sanalyp otyr. Qorshaǵan ortany qorǵaý sektoryna sıfrlyq tehnologııalardy engizý tabıǵı resýrstardy turaqty basqarýdyń da mańyzdy qadamy bolmaq. «Býrabaı» ulttyq parkinde júzege asyrylǵan ınnovasııalyq joba ormandy alqapty qorǵap, ekologııalyq sharýashylyqty óristeýge tyń serpin bermek.
