Eki kúnge sozylǵan aýqymdy is-sharada mazmundy ári maǵynaly taqyryptar qaýzaldy. Ásirese forým barysynda klımattyń ózgerýi men geosaıası turaqsyzdyq sııaqty álemdik máselelerdiń qozǵalǵany qýantady. Bul medıa tek aqparat taratý quraly ǵana emes, qoǵamdyq sanany qalyptastyryp, turaqty damý maqsattaryna úles qosatyn kúsh ekenin kórsetedi.
Búginde jasandy ıntellekt pen úlken derekter (Big date) medıanyń kelbetin túbegeıli ózgertip jatyr. Tipti áleýmettik jelilerdegi aqparat, pikir tutas memlekettiń halyqaralyq beınesine áser etip otyr. Demek bizge bul quraldardy tıimdi ári sanaly paıdalanatyn ortaq strategııa qajet.
Jalpy, buqaralyq aqparat quraldaryna jańa tehnologııalardyń áseri ekiudaı kózqarasty qalyptastyrdy. Jasandy ıntellekt medıany jyldamyraq, tıimdirek jáne kóp aýdıtorııany qamtıtyn quralǵa aınaldyrdy. Mátinderdi avtomatty túrde jazý, beıneler men aýdıolardy taldaý, tipti deepfake sekildi tehnologııalar kontent óndirý jyldamdyǵyn birneshe esege arttyrdy. Biraq bul jerde sapa men etıka máselesi ózektene túsedi. Tehnologııa báribir oılaný, syrlasý, tildesý sııaqty adamı qarym-qatynasty ornata almaıdy.
Aýdıtorııanyń da minez-qulqy ózgerdi. Qazirgi kórermen nemese oqyrman jańalyqty dástúrli BAQ-tan emes, kóbine áleýmettik jeli arqyly oqıdy. Bul kontentti usyný formaty men taratatyn platformasynyń mańyzdylyǵyn arttyrdy. Desek te dástúrli basylymdar transformasııalanyp jatyr. Mysaly, bizde eki oblystyq gazet pen bir jýrnal bar. Áleýmettik jelilerdegi belsendiligimizden bólek, YouTube platformasynda da podskast shyǵaryp, aqparat taratamyz.
Qazirgi tańda jasandy ıntellekt pen zamanaýı tehnologııalar qansha qarqyn alyp jatsa da, dástúrli baspasózdiń mańyzy men qajettiligi ózektiligin joımaıdy. Qaıta halyqpen tyǵyz baılanysyn arttyra otyryp, jańa zamanǵa beıimdeldi. Sol sebepti biz de aqparat maıdanyndaǵy jumysymyzdy jalǵastyra beremiz.
Raýken OTYNShIN,
«Aqtóbe Medıa» JShS dırektory
