Eresekter arasyndaǵy týrnırdiń ashylý saltanatynda Ábdisalan Nurmahanovtyń jary Kúlpásh Ǵalymjanqyzy dańqty boksshy týraly estelik aıtty. Al Túrkistan oblystyq dene shynyqtyrý jáne sport basqarmasynyń basshysy Ǵalymjan Hýdııarov dástúrli týrnırdiń mańyzdylyǵyna toqtalyp, qatysýshylarǵa sáttilik tiledi.
Sondaı-aq dańqty boksshynyń ónegeli ómir jolynan aqparattar jas sportshylardyń esine salyndy. Ábdisalan Nurmahanov 1993 jyldan bastap bokstan Qazaqstan ulttyq qurama komandasynyń bas bapkeri atandy. Qazaqstan quramasy 1995 jyly Tashkent qalasynda ótken Azııa chempıonatynda 6 altyn júldeni jeńip aldy. 1996 jyly ótken jazǵy Olımpıada oıyndarynda onyń shákirtteri 1 altyn, 1 kúmis, 2 qola medal oljalap, jalpykomandalyq esepte 3-oryndy ıelendi. Osy Olımpıada oıyndarynda Vasılıı Jırov eń úzdik boksshyǵa taǵaıyndalǵan Vel Barker kýbogyn enshiledi. Qazaq sporty tarıhynda óshpes iz qaldyrǵan qaıratker atynda Túrkistanda sport mektebi bar. Jyl saıyn Á.Nurmahanov atyndaǵy dástúrli týrnır ótkizilip keledi.
Al bıylǵy týrnırde О́zbekstan, Tájikstan, Qyrǵyzstan elderinen jáne elimizdiń barlyq aımaǵynan 13 salmaq dárejesinde 100-ge jýyq sportshy baq synap jatyr.
