Aldymen ýnıversıtet rektory Janar Amangeldiqyzy ekspedısııa múshelerin arnaıy qabyldap, iltıpatyn bildirdi. Sondaı-aq ýnıversıtettiń ulttyq qundylyqtar baǵytynda atqaryp jatqan ǵylymı jobalaryn atap ótip, bolashaqta da bul baǵyttaǵy kez kelgen ıgi bastamalarǵa qoldaý kórsetetinin jetkizdi.
Kezdesý barysynda Qazaqstan Jazýshylar odaǵy Basqarma Tóraǵasynyń orynbasary Ǵalym Qalıbekuly sóz sóılep, ekspedısııanyń mazmuny men mańyzyn atap ótti. Sonymen qatar, Zeınolla Sániktiń mol murasyn ǵylymı aınalymǵa engizý jóninde usynys bildirdi
– Zeınolla Sániktiń «Qazaq etnografııasy» atty eńbegi – ultymyzdyń rýhanı murasyndaǵy shoqtyǵy bıik týyndylardyń biri. Bul kitap etnografııalyq ǵylymnyń ǵana emes, ulttyq sananyń irgetasyn bekitetin qundy eńbek, – dep atap ótti.
Budan keıin ýnıversıtettiń Ahmet Iаsaýı atyndaǵy kitaphanasynda stýdentter, etnograf-ǵalymdar, aqyn-jazýshylar men ádebıet súıer qaýymnyń qatysýymen mazmundy kezdesý ótti. Is-sharany Jazýshylar odaǵynyń Túrkistan oblysyndaǵy ókili, aqyn Aıdar Seıdazym júrgizip, ulttyq qundylyqty ulyqtaýǵa baǵyttalǵan ekspedısııanyń maqsatymen tanystyrdy.
Qazaqstan Jazýshylar odaǵy tóraǵasynyń orynbasary Ǵalym Qalıbekuly Memlekettik keńesshi Erlan Qarınniń ekspedısııa múshelerine arnalǵan arnaıy quttyqtaý hatyn oqyp berip, jınalǵan jurtshylyqty rýhanı serpiliske jeteledi.
Kezdesý barysynda qoǵam qaıratkeri, ǵalym Ulyqpan Sydyqov sóz sóıledi.
Bul ulttyq ekspedısııa Ulttyq quryltaıda kóterilgen oı-tujyrymdarmen úndes. Ulttyń birtutastyǵy, ár qazaqtyń boıyndaǵy tektilik pen rýhanı jaýapkershilik – ulttyq qundylyqtar júıesiniń aıǵaǵy, dedi ol.
Jıyn aıasynda Zeınolla Sánik atyndaǵy Mádenıet qory ázirlegen derekti fılm kópshilik nazaryna usynyldy. Bul týyndy qalamger murasynyń eldik múdde turǵysynan qanshalyqty baǵaly ekenin taǵy bir márte aıǵaqtady.
Jıynda sóz sóılegen ǵalym Janat Zeınollaqyzy ákesiniń ǵylymı murasyn zerdeleý – jas urpaqtyń ulttyq bolmysyn qalyptastyrýda sheshýshi ról atqaratynyn jetkizdi.
Fılologııa ǵylymdarynyń doktory, professor Seıdolla Sadyq:
– Túrkistan – ulttyq qundylyqtardyń altyn besigi. Bul kıeli shahardaǵy ekspedısııanyń mán-maǵynasy erekshe. Ulttyq sanada umytylyp bara jatqan kóptegen qundylyqtardyń qaıta jańǵyrýyna túrtki bolatyn bastama – osy, – deıdiFılologııa ǵylymdarynyń doktory, professor Shákir Ybyraev óz kezeginde:
– Zeınolla Sániktiń «Qazaq etnografııasy» atty eńbegimen alǵash tanysqan sátte erekshe áserge bólendim. Bul – meniń ómir boıǵy zertteý nysanym bolǵan etnografııa salasynyń rýhanı dińgegi. Sol eńbektiń yqpalymen ózim de etnografııalyq baǵytta birqatar ǵylymı týyndylar jazdym, dedi ol.
Kelesi kezekte tarıhshy-ǵalym Haziretáli Tursyn etnografııa ǵylymynyń qazaq tarıhy men dúnıetanymyndaǵy orny týraly qysqasha mazmundama jasady.
Kezdesýdi Zeınolla Sánik atyndaǵy mádenıet qorynyń dırektory, aqyn Serik Qalıev qorytyndylap, ekspedısııanyń el rýhanııatyna qosatyn úlesin atap ótti.
Shara sońynda Zeınolla Sániktiń «Qazaq etnografııasy» atty eńbegi ýnıversıtettiń oqytýshylaryna, stýdentterge, zııaly qaýym men aqyn-jazýshylarǵa saltanatty túrde syıǵa tartyldy.
