Is-shara Konstıtýsııanyń 30 jyldyǵyna arnalǵan Úkimettiń «Ata Zań – táýelsizdik tiregi» jospary aıasynda S. Amanjolov atyndaǵy Shyǵys Qazaqstan ýnıversıtetinde uıymdastyryldy.
Konferensııa jumysyna Májilis depýtaty E. Saıyrov, Bas Prokýrordyń keńesshisi T. Adamov, óńirlik memlekettik qurylymdar men quqyq qorǵaý organdarynyń jetekshileri, advokattar men notarıýstar qaýymdastyǵynyń ókilderi, sondaı-aq otandyq jáne sheteldik ǵylymı sarapshylar qatysty. Jıyn barysynda 2022 jyly júzege asyrylǵan konstıtýsııalyq reforma nátıjeleri men ony «Zań jáne tártip» qaǵıdatyna súıene otyryp, is júzinde júzege asyrý joldary jan-jaqty talqylandy.
B. Nurmuhanov óz baıandamasynda: «Qazirgi tańda elimizdiń azamattary qoldanystaǵy zańdardyń Konstıtýsııaǵa sáıkestigin tekserý tetigin belsendi paıdalana bastady. 2023 jyldan beri Konstıtýsııalyq Sotqa 10 myńnan astam ótinish kelip tústi, onyń ishinde Shyǵys Qazaqstan oblysynyń turǵyndarynan – 458 ótinish tirkeldi. Sońǵy eki jylda Sot 70 normatıvtik qaýly qabyldap, Parlamentke elimizdegi konstıtýsııalyq zańdylyq jaıynda eki joldaý joldady», dep atap ótti.
Jıyn aıasynda Konstıtýsııalyq Sot Apparaty men S. Amanjolov atyndaǵy Shyǵys Qazaqstan ýnıversıteti arasynda yntymaqtastyq jónindegi ózara túsinistik týraly memorandýmǵa qol qoıyldy. Bul qujat taraptardyń quqyqtyq mádenıetti damytý, konstıtýsııalyq zańdylyqty nyǵaıtý, sondaı-aq ortaq ǵylymı-tájirıbelik is-sharalardy uıymdastyrý jáne analıtıkalyq aqparattarmen almasý boıynsha birlesken jumysty kózdeıdi.
