Atalǵan eldi meken shahar mártebesin alǵan soń, 4 myń kitap qorymen shaǵyn ǵana ǵımarat ishinde qalalyq kitaphana qurylǵan edi. Sol 2022 jyldan bastap-aq munda jyl saıyn túrli mádenı-kópshilik is-shara uıymdastyrylyp, turǵyndardyń kitap oqýǵa degen qyzyǵýshylyǵyn arttyrý maqsatynda jumys istep keldi. Al bıyl Bolat О́temuratov qorynyń qoldaýymen salynǵan ortalyqqa kóshirilip, zamanaýı, jańa keıipke endi.
Aıta keteıik, ortalyqtyń jalpy aýdany – 8,5 myń sharshy metr, nysan bir ýaqytta myń adamdy qabyldaı alady. Ortalyq – halyqaralyq standarttarǵa saı salynǵan iri mádenı-sporttyq keshen. Munda sporttyq, bilim jáne bos ýaqyt ótkizýge arnalǵan alańdar bar. Qonaqtar úshin 233 oryndyq kınoteatr, 300 adamǵa arnalǵan dárishana, kórme jáne konferensııa zaldary, stýdııalar, kovorkıng jáne oqý zaly bar kitaphana qyzmet etedi. Balalar úshin robottehnıka men shahmattan bastap, horeografııa, qoldanbaly ónerge deıingi túrli úıirme jumys isteıdi. Qosshydaǵy kreatıvti hab – Memleket basshysynyń tapsyrmasymen ashylǵan elimizdegi 13-ortalyq. Álqıssa.
Qosshy qalasy Ortalyqtandyrylǵan kitaphana júıesiniń basshysy Symbat Baýyrjanqyzynyń aıtýynsha, jyl saıyn kitap qoryn tolyqtyrý jumystaryn júrgizý nátıjesinde búginde kitap qory 20 myńǵa jetken. Oblystyq jáne jergilikti bıýdjettiń qarjylandyrýymen turaqty túrde oqyrmannyń suranysyndaǵy kitaptar satyp alynady. Bul jumystardy kitaphananyń jınaqtaý-óńdeý bóliminiń mamandary júzege asyrady. Kópshilik kórmeıtin, bilmeıtin, biraq kitaphana isindegi asa mańyzdy jumystardyń biri osy deıdi.
«Kúndelikti oqyrmannyń suranysyndaǵy kitaptar arnaıy jýrnalǵa tirkelip otyrady. Ol tizimdi kitaphanashylar jınaqtap, ári qaraı kitap dúkenderimen, baspalarmen baılanys ornatady. Qajetti tizimdi bekitip, ony satyp alǵan soń, jumystyń uqyptylyq pen muqııattylyqty qajet etetin bóligi bastalady. Árbir kelgen kitapty nómirlep, kitaphana móri basylyp, jýrnalǵa tirkeledi. Kitaphana isin avtomattandyrý júıesinde elektrondy katalogke engiziledi. Munyń barlyǵy – ár kitapty óńdeýden ótkizý kezeńi. О́ńdeýden ótken kitaptar kitaphananyń qyzmet kórsetý bólimine tapsyrylady», deıdi Symbat Baýyrjanqyzy.
Jańa kitaphananyń kórki kóz tartady. Stıli de bólek, keń ári zamanaýı úlgide salynǵan. Eń bastysy, oqyrmanǵa barlyq jaǵdaı jasalǵan: kitapty qalaı oqımyn deseńiz de óz erkińiz. Samsap turǵan sóreler. Kreatıvti kitaphanaǵa kerekti qural-jabdyqtar tolyǵymen qamtylǵan. Ishki dızaıny da janǵa jylylyq, mıǵa tynyshtyq syılaıdy. Iá, rýhanı oryn búginde elimizde balamasy joq kitaphananyń biri bolyp esepteledi.
«Kúndelikti 100–150 oqyrman keledi. Árıne, oqyrmannyń kóptigi kóńil qýantady. Bul kitaphanaǵa degen jastar arasynda jańa kózqaras týdyratyndyǵy anyq. Jalpy, jyl saıyn kitaphana jıyrma bes myń kelýshige qyzmet kórsetedi, onyń ishinde mektep jasyndaǵy baladan bastap zeınettegi qarııalarǵa deıingi turǵyndar bar. Árqaısysynyń suranysy ártúrli, soǵan saı qajetti aqparat berý – bizdiń basty maqsatymyz», deıdi Ortalyqtandyrylǵan kitaphana júıesiniń basshysy.
Sondaı-aq, onyń aıtýynsha, kreatıvti kitaphanada mádenı-rýhanı is-sharalar da jıi ótedi.
«Kitaphana – avtor men oqyrman arasyndaǵy altyn kópir ispettes bolǵandyqtan, aqyn-jazýshylarmen shyǵarmashylyq baılanystamyz. Sondaı-aq bıyl «Folıant» baspasy da jańa kitaphananyń ashylýyna oraı myńnan astam kitapty syıǵa tartty. Odan bólek esimderi elimizge aıan aqyn-jazýshylar óz kitaptaryn qorǵa tartý etip otyrady», deıdi ol.
Ǵylym kúnine oraı Ortalyq kitaphananyń uıymdastyrýymen Sanjar Kerimbaıdyń «Qanysh jáne ǵylymı maıdan» kitaby jelisinen ashyq dáris ótti. Shoqan Ýálıhanovtyń 190 jyldyǵyna oraı Jarylqap Beısenbaıuly men Serik Negımovtiń qatysýymen «Shoqan Ýálıhanov murasy» taqyrybynda ǵylymı konferensııa da uıymdastyrylǵan. Al qazirgi tańda kitaphana qabyrǵasynda «Janazyq» oqyrman klýby qurylyp, senbi saıyn túrli shyǵarma talqylaıdy.
«Astana qalasynan «Alqa», «Oyorda» klýbtary da kitaphanamyzǵa qyzyǵýshylyq tanytyp, birlese jumys isteýge daıyn ekenderin aıtyp jatyr. Munyń bári jastar arasynda kitap oqý qaıta trendke aınalyp kele jatqandyǵyn kórsetedi», deıdi Symbat Baýyrjanqyzy.
Taǵy bir jaqsy jańalyq, bıyldan bastap jumys ýaqytynda kitaphanaǵa kelýge ýaqyty joq jandar úshin mekemelerge baryp qyzmet kórsetetin «jyljymaly kitaphana» iske qosyldy. Búginde bul qyzmetti Qosshy qalasynyń balabaqshalary men qalalyq emhana paıdalanyp otyr.
«Bizdiń jas qalamyzda osyndaı keremet komıýnıtı ortalyqtyń ashylǵanyna óte qýanyshtymyn. Sheteldik kitaphanalardan bir mysqal kem túspeıtin úlgidegi rýhanı oshaq qalamyzdyń turǵyndaryn bek qýantty. Oqyrmanǵa jaıly jaǵdaı jasalyp, turǵyndardyń oqýǵa qushtarlyǵy arta tústi. Qosshy – halyq sany tez ósip kele jatqan qalalardyń biri, sol sebepti teńdesi joq kitaphananyń bizdiń qaladan ashylýy qajet edi. Kúndelikti oqyrman qarasy artpasa, azaıǵan emes. Kitapty janymen súıetin kitaphanashy úshin bul – zor mártebe», deıdi Qosshy qalasy Ortalyqtandyrylǵan kitaphana júıesiniń basshysy Symbat Baýyrjanqyzy.
Rýhanı, mádenı ımmýnıteti myqty eldiń irgesi de berik, sapasy da jaqsy bolary sózsiz. Oqıtyn ult qalyptastyrý jolynda Memleket basshysy da birqatar bastama kóterip, tikeleı nazarynda ustap otyr. Úshinshi Ulttyq quryltaıda barsha halyqty kitap oqý mádenıetin qalyptastyrýǵa shaqyrǵany da este. Osy oraıda zamanaýı kitaphanalardyń sanymen qosa oqyrmany da kóbeıgeni oqıtyn ult qalyptastyrý jolyndaǵy negizgi qadam bolmaq.
