Táýelsizdiktiń alǵashqy jyldarynda qurylǵan Qazaqstan halqy Assambleıasy «biz ártúrlimiz, biraq teńbiz» qaǵıdasyn is júzinde júzege asyrǵan halqymyzdyń halyqaralyq brendi, biregeı qoǵamdyq kelisim úlgisiniń berik irgetasy boldy. Prezıdent búgin Assambleıanyń qoǵamdy toptastyrýdaǵy jáne ulttyq biregeılikti nyǵaıtýdaǵy rólin tolyq ashyp kórsete otyryp, ony memlekettigimizdiń ınstıtýsıonaldyq tiregi, «birlik pen teńdiktiń, beıbitshilik pen kelisimniń shynaıy sımvoly» dep atady. Bul berilgen baǵamen barsha otandasymyz kelisedi dep oılaımyn.
Prezıdent taǵy da qoǵamymyzdyń basty qaǵıdattary men qundylyqtaryn aıqyn atap ótti. Eń aldymen, bul – eshkimdi ultyna, tiline nemese dinine qarap kemsitýge jol bermeý. Árbir etnos óz ana tilin, mádenıeti men dástúrlerin erkin damytýǵa quqyly. Bul – Ádiletti Qazaqstannyń negizi. Elimizde barshaǵa teń múmkindik berilgen, onda tabysty bolashaqtyń kepili – ár azamattyń jaýapkershiligi men ortaq birligi.
Sonymen qatar Qasym-Jomart Kemeluly el ishindegi kelisim men tynyshtyqty buzýǵa baǵyttalǵan arandatýshylyq áreket pen jalǵan aqparat taratý, konfessııaaralyq qatynastar men til máselesin saıasılandyrýǵa jol berilmeıtini jóninde qatań ári berik ustanymyn bildirdi. Prezıdent elimizdegi turaqtylyqty shaıqaltqysy keletin kez kelgen arandatýshylyq áreket, sonyń ishinde shetelden basqarylatyn destrýktıvti áreketter zań aıasynda qatań túrde toqtatylatynyn naqty aıtty. Zań aldynda bári teń. Qoǵamda tártip pen zań ústemdigi qaǵıdaty barlyq memlekettik organ tarapynan múltiksiz oryndalady. Bul ustanym Parlament depýtattary qabyldaıtyn zańdardyń bárinde aıqyn jáne naqty kórinis tabady.
Qazaqstan halqy Assambleıasynyń jasampaz qyzmetiniń arqasynda qazaqstandyq ulttyń kópetnostylyǵy syn-qater emes, myqty básekelik artyqshylyqqa aınaldy. QHA 130-dan asa etnostyń mádenıeti, tili, dástúri men rýhanııatyn saqtaı otyryp, olardy birtutas, progressıvti qoǵamǵa biriktire aldy. Osyndaı mýltımádenıetti ártúrlilik búkil halyqtyń rýhanı baılyǵyn arttyryp, olardy tatýlyqta, tózimdilik pen dostyqta ómir súrýge úıretti. Prezıdent aıtqandaı, bul – jaı ǵana uran emes, bul – el azamattarynyń kúndelikti ómir saltynyń máni.
Memleket basshysy bul saıasattyń ómirde qalaı iske asyrylyp jatqanyn kórsetetin birqatar qarapaıym mysal keltirdi. Bul – ulttyq teatrlar, murajaılar, BAQ pen mádenı uıymdardyń jumysy. El turǵyndarynyń Naýryz, Maslenısa, Sabantoı sııaqty merekelerdi birge atap ótýi. Qazaqstan azamattarynyń túrli saladaǵy – eńbek pen qoǵamdyq ómirdegi úlken jetistikteri olardyń ultyna nemese dinı senimine qaramastan júzege asyp jatyr. Sondaı-aq jastardyń, eriktilerdiń, medıasııa qurylymdarynyń belsendi qyzmeti de atalyp ótti. Munyń barlyǵy birigip, elimizdiń yntymaǵy men tutastyǵyn qamtamasyz etetin tıimdi júıeni qalyptastyryp otyr.
Búgin Memleket basshysy elimizdegi túrli etnostyń dástúri, tili men ádet-ǵuryptaryna degen shynaıy qurmet pen Qazaqstannyń halyqaralyq arenadaǵy, ásirese kórshi memlekettermen qarym-qatynasyndaǵy ustanymdary arasynda uqsastyq bar ekenin atap ótti. Qazirgi geosaıası jaǵdaılardy eskere otyryp, Prezıdenttiń baıandamasy men Qazaqstannyń etnosaralyq kelisim tájirıbesi sheteldik sarapshylar men elıta úshin burynǵydan da zor qyzyǵýshylyq týdyratyny anyq dep oılaımyn.
Prezıdent óz sózinde Assambleıany odan ári damytý boıynsha birqatar mindet qoıdy. Bul – Dostyq úıleriniń jumysyn kúsheıtý, olardy azamattar men sheteldik qonaqtarǵa tanymal týrıstik baǵyttar kartasyna engizý; mádenı jumysty jandandyrý jáne teatr óneriniń festıvalin ótkizý; Assambleıa músheleriniń «Taza Qazaqstan» aksııasyna qatysýyn keńeıtý; Jumysshy mamandyqtary jylyna arnalǵan is-sharalardy júzege asyrý. Munyń bári – qarapaıym jáne barshaǵa túsinikti basymdyqtar. QHA qoǵamnyń damýyna úles qosatyn belsendi qurylym ekenin taǵy bir márte kórsetti.
Búgin Memleket basshysy «Bir el – bir múdde» depýtattyq tobynyń jumysyn da joǵary baǵalady. Onyń quramyna Májilistiń alty fraksııasynan 20 depýtat kiredi. Olar Úkimetpen birlese otyryp, zań shyǵarý jumystary arqyly ultaralyq kelisimdi qamtamasyz etý jónindegi memlekettik saıasatty júzege asyrady.
Prezıdent aıtqandaı, beıbitshilik pen turaqtylyq – yntymaq pen dáıekti eńbektiń jemisi. Endi kópetnosty ortaq shańyraǵymyzda kelisim men tártipti saqtaý úshin memleket pen azamattardyń kúsh-jigerin biriktirýdi jalǵastyrý mańyzdy. Bul baǵytta depýtattar elimizdiń ál-aýqatyn shynymen oılaıtyn jáne onyń damýyna naqty úles qosýǵa nıetti barlyq adammen birlese jumys isteýge ázir.
Erlan Qoshanov,
Májilis tóraǵasy
