Sýretti túsirgen – Igor PROHOROV
Saltanatty jıynǵa «Hýdojestvennaıa lıteratýra» baspasynyń bas redaktory Georgıı Prıahın, memleket jáne qoǵam qaıratkerleri Qýanysh Sultanov, Qyrymbek Kósherbaev, Eraly Toǵjanov, Ortalyq saılaý komıssııasynyń tóraǵasy Nurlan Ábdirov, general Vladımır Bojko, fılologııa ǵylymdarynyń doktory Ásıma Ishanova, sondaı-aq ádebıetsúıer qaýym men jas oqyrman qatysty. Basylymnyń taralymy – 1 000 dana.
Jańa týyndy el Prezıdenti Qasym-Jomart Toqaevtyń alǵy sózimen bastalady. Memleket basshysy Ábish Kekilbaevpen uzaq jyldar Senatta qatar jumys istegenin, ony asa joǵary qurmetpen qabyldaǵanyn tebirene eske alady. Prezıdent bul jyldardy óziniń ómirindegi baqytty kezeń retinde sıpattap, jazýshynyń danalyǵyna, tulǵalyq bıigine bas ıetinin jetkizedi.
Sondaı-aq alqaly jıynda memleket jáne qoǵam qaıratkeri Qyrymbek Kósherbaev sóz alyp, abyz qalamger týraly keńinen tolǵady.
«Máskeýde Qazaqstannyń elshisi qyzmetinde júrgenimde Álemdik ádebıet ınstıtýtynyń dırektory Felıks Kýznesovpen jaqsy aralasyp edim. Sol kisi bir sózinde «Áýezov – qazaq ádebıetiniń keńdiginiń, Kekilbaev –tereńdiginiń ólshemi» degen bolatyn. Myqtylardyń bir-birin moıyndaýy ońaı bolmaıdy. Áıtse de Ábish aǵany moıyndamaý múmkin emes edi. Men Ábemen – ádebıetimizdiń klassıgi Ábdijámil Nurpeıisovpen qazaqylyq jaǵynan jaqyn adammyn, oǵan qosa aǵaıyndyǵymyz taǵy bar. Erkin sóılese beretinmin. Bir joly ázil-shynyn aralastyryp: «Nurpeıisov te myqty, Kekilbaev ta myqty. Áıtse de qaısysy myqtyraq?» dep suraq qoıǵanmyn. Ábeń oılanyp otyrdy da: «Áı, ol buırabasqa jetý qaıda?!» dep edi», dedi Qyrymbek Kósherbaev.
Kitapta Ábish Kekilbaevtyń san qyrly bolmysy keńinen ashylyp, qalamgerdiń rýhanı tereńdigi men adamgershilik qasıetteri sıpattalady. Jazýshy, dramatýrg, aqyn, tarıhshy, saıasatker, fılosof, ádebıettanýshy, pýblısıst – bul tek Ábishtiń boıyndaǵy qasıetterdiń bir parasy ǵana. Avtor ony «dala danalyǵynan» nár alǵan, zamanynyń fenomeni dep sıpattaıdy. Avtor óz estelikterinde Ábish Kekilbaevtyń adamı qasıetterine de erekshe toqtalady.
Kitaptyń orys tilinde jaryq kórýi – Ábish Kekilbaevtyń shyǵarmashylyǵyn jańa aýdıtorııaǵa tanytýǵa múmkindik beredi. Onyń eńbekteri buǵan deıin aǵylshyn, fransýz, arab, túrik, cheh, ózbek, qyrǵyz, tájik tilderine aýdarylǵan.
