Alash dalasyndaǵy asqan erlik, rýhanı mol mura, mándi mádenı asyl qazynalardy dáripteýge arnalǵan konferensııa oblys ortalyǵyndaǵy Abylaı han eskertkishine gúl shoqtaryn qoıyp, taǵzym etýmen bastaldy. Qazaq halqyn asa kúrdeli, óte qıyn HÚIII ǵasyrda bir týdyń astyna biriktirip, saqtap qalǵan uly Abylaı han tulǵasyn zerdeleýdi maqsat etken konferensııada hannyń joryqty joldarynan syr shertý, Reseı jáne Mońǵolııa jerindegi qandastarymyzdyń ómiri men shyǵarmashylyǵyn nasıhattaý, sonaý Abylaı zamanynan bastap abyz Tonykókke deıingi kezeńde ómir súrgen bahadúr batyrlardyń erlik isteri týraly aıtyldy. Hannyń joryqty joldarymen júrip ótip, teńizdiń túbinen marjan tergendeı yjdaǵatty eńbek etip, este joq eski kezeńniń dáıekti deregin jınaǵan ólketanýshy Murat qajy Ydyrysuly jınaqtaǵan «Abylaı hannyń qara joly» kitabynyń úshinshi, tórtinshi tomdarynda tyń derekter toptastyrylǵan. Úshinshi tomda Ulytaý óńiri, Joshy ulysy, Altyn orda, Qazaq handary, áz-Jánibek, Ábilqaıyr, Abylaı, Sultan Beıbars, Alash arystary, Ahmet Baıtursynuly, Álıhan Bókeıhan, Mirjaqyp Dýlatov, Shárápı Áljanov, Álimhan Ermekov tárizdi tulǵalar týraly tyń derekter toptastyrylǵan. Tórtinshi tomda Reseı men Mońǵolııa jerindegi qandastardyń ómiri men shyǵarmashylyǵy uly túrkiniń qundy muralaryna qatysty zertteýler men joljazbalar jınaqtalǵan.
– Búgingi konferensııanyń mańyzy óte zor, – deıdi L.N.Gýmılev atyndaǵy Eýrazııa ulttyq ýnıversıtetiniń professory, fılologııa ǵylymdarynyń doktory Serik Negımov, – qazaq dalasynda Abylaıdyń rýhy júrýi kerek, ádiletti Qazaqstandy tolyq ornatý úshin Abylaısha oılanyp, Abylaısha tolǵanýymyz qajet. Keıingi urpaq týǵan elin, jerin súıýi úshin bahadúr babalarymyzdyń máńgi ólmes erlik isteri men rýhanı baılyǵy arqyly tárbıelengen jón.
Qos kitaptyń tusaýyn Túrkııadaǵy Mımar Sınan kórkemóner ýnıversıtetiniń professory, tarıh ǵylymdarynyń doktory, túrkitanýshy Ábdiýaqap Qara men Vashıngton ýnıversıtetiniń professory Talant Maýqanuly tárizdi azamattar kesti.
Tarıhı mańyzy óte zor, rýhanı tereń mazmunǵa ıe bolǵan konferensııa barysynda otandyq jáne sheteldik ǵalymdardyń oryndy oı-pikirleri kópshilikti beıjaı qaldyrmasa kerek. Ulttyń órshil rýhyn ulyqtaıtyn tarıhı jadymyzdy jańǵyrtyp, ýaqyt shymyldyǵynan arshyp alǵan mazmundy jıyn boldy bul!
Kókshetaý
