Depýtattyń aıtýynsha, zań boıynsha keminde bes jylǵa aýylǵa barǵan dárigerlerge eń tómengi jalaqynyń júz eselengen mólsherinde kótermeaqy tólenýi tıis. Alaıda 2024 jyly 17 oblystyń 6-ynda bul tólem berilmegen. Onyń basty sebebi – jergilikti ákimdikter asa tapshy medısınalyq mamandyqtar tizimin ýaqytynda bekitpegen.
«Mysaly, Abaı oblysy, Aıagóz aýdanynyń О́rken aýylyna jumys isteýge barǵan jalpy tájirıbelik dáriger Aıjan Alpysbaıqyzy zań boıynsha 8,5 mıllıon teńge alýy kerek edi. Biraq bul mamandyq óńirde asa tapshy dep tanylmaǵandyqtan, oǵan tólem berilmedi», deıdi depýtat.
Onyń aıtýynsha, Densaýlyq saqtaý mınıstrliginiń standarttaryna sáıkes, bir jalpy tájirıbelik dárigerge – 1700, al bir terapevtke – 2200 adamnan kelýi kerek. Biraq halyq sany az aýyldarda bir ǵana dáriger barlyq turǵynǵa qyzmet kórsetip otyr.
«Eger jalpy tájirıbelik dáriger men terapevt mamandyqtary asa tapshy tizimine engizilmese, aýyldaǵy dáriger tapshylyǵy sheshilmeıdi», deıdi Sabılıanov.
Atalǵan másele boıynsha depýtat Úkimetke úsh naqty usynys joldady:
1. Asa tapshy mamandyqtar tizimine jalpy tájirıbelik dáriger men terapevtti qosý;
2. Abaı oblysy boıynsha bul tizimdi shuǵyl bekitý;
3. Aýylǵa barǵan dárigerlerge 8,5 mln teńge kótermeaqyny tolyq tóleý.
«Sizden osy saýaldy zańnamada belgilengen merzimde qarastyryp, tıisti sharalardy qabyldaýdy suraımyn», dedi depýtat.
Janel TО́LEÝBEKOVA, EUÝ 2 kýrs stýdenti
