Gete adamnyń tosqaýyldardy buzyp, ony jeńe biletin qabiletine sendi. Onyń ómiri de únemi eńbek pen adamdyq ıdealdy qalyptaýdyń úlgisi boldy. Alyptyń oıynsha, shyǵarmashylyq degen, ómirdiń mánin túsinýge tyrysyp, onyń tereń qarama-qaıshylyqtaryn ashý edi. Sondyqtan da, «poezııanyń mindeti uly aqıqatqa jetip, ony kórkem beıneleı bilý» dedi. Al birde búgingi kúnniń ózin jetildirýge taptyrmas múmkindik ekenin aıta kelip, «taǵdyr maǵan qandaı sátsizdik syılasa da, qaıbir usaq jaǵymsyzdyqqa bola ózimdi azaptaǵym kelmeıdi, kerisinshe, qazirgiden góri jaqsy bolýǵa kúsh salyp, ózimdi jetildire túsemin», deıdi ol.
Psıhologter ózine senip, qareket etken jan ǵana álemdi asha alatynyn, kesheniń qaqpanynan bosanatynyn baıan etedi. Al ótken qaıǵy men qusa – adam rýhyna ońdy baǵdar. Nemis aqyny Gelderlıng «Eger men baqytsyzdyǵyma qaraı jaqyndasam, damı túsemin» dep tegin aıtpasa kerek. «Qandaı da bir muń men qıyndyqtan ótý rýhty shyńdaı túsedi. Sondyqtan kemel bolý úshin azapty joldardy eńserý de mańyzdy», deıdi jantanýshylar. О́ıtkeni qozǵalǵan jan qalaıda qatelikke barmaq, teris jolǵa da túspek. Arıstotel: «Synnan qashýdyń bir ǵana joly bar: eshteńe aıtpańyz, eshteńe istemeńiz, eshkim bolyp qalyńyz», degen-tin.
«О́kinbe, ókpeleme búginińe,
О́mir, ómir, bolmaıdy túńilýge,
Máńgi saǵan jazbaǵan súrinýge,
Qaqyń bar qaıta turyp, júgirýge!» depti Muqaǵalı.
Kesheniń danalyǵy búginge jetedi, búgingi qareket bolashaqty qalaıdy. Qalaı desek te, eńbek pen aqyldyń almaıtyn qamaly joq.
