Eurasian Resources Group (ERG) – tabıǵı resýrstardy óndirip, óńdeıtin, energetıka, logıstıka jáne marketıng salalarynda tolyq biriktirilgen, álemdegi eń iri kompanııalardyń biri. ERG kompanııalar toby Azııa, Eýropa, Afrıka men Amerıkada bıznes júrgizip, óz ónimderin álemniń 40-tan astam eline jetkizedi. Búginde ERG kásiporyndarynda 60 myńnan astam jýyq adam jumys isteıdi.
ERG kompanııalar toby – elimizdegi kóptegen áleýmettik jobalardyń demeýshisi. ERG Skills sheberlik baıqaýynyń aıasy jyl saıyn keńeıip, respýblıka óńirleri boıynsha kásibı mamandardy daıarlaýmen qatar jumysqa ornalasýǵa múmkindik jasap otyr. Sheberlik saıysy jylda stýdentter jáne kompanııanyń jas mamandary arasynda ótip keledi.
Bıyl mamyr aıynda Aqtóbe jáne Qostanaı oblystarynda ótken ERG Skills kásibı sheberlik baıqaýyna «Qazhrom», SSKО́B kásiporyndarynyń jas mamandary, ERG men Kolledjder alıansy quramyndaǵy kolledjder stýdentteri qatysty.
Hromtaý taý-tehnıkalyq joǵary kolledji, Aqtóbe ónerkásiptik tehnologııalar kolledji jáne Aqtóbe joǵary polıtehnıkalyq kolledji 11 quzyrettilik boıynsha jas mamandarǵa zamanaýı sheberhanalar men zerthanalaryn usyndy.
ERG-diń Qazaqstandaǵy bas dırektory Serik Shahajanov ERG Skills baıqaýyna qatysýshylarǵa sáttilik tilep, óndiriste kásibı sheberliktiń mańyzdy ekenine toqtalyp, «Memleket basshysy bıylǵy jyldy jumysshy mamandar jyly dep jarııalap, jastar arasyndaǵy jumysshy kásibniń bedelin atap ótti. Tehnologııalar damyǵan saıyn bizdiń kásiporyndarǵa tájirıbeli mamandarǵa suranys arta beredi. Sondyqtan baıqaý alańyndaǵy tájirıbe jas mamandar úshin asa qajet», dep atap ótti.
Jeńimpazdar men júldegerler baǵaly syılyqtarmen marapattalyp, ERG kásiporyndaryna jumysqa qabyldaý kezinde basym kandıdattardyń tizimine endi. Sonymen qatar bıyl ERG Skills tarıhynda alǵash ret «Qazhrom»TUK» AQ basshylyǵynyń bastamasymen úzdik tájirıbelik daǵdylary men sheberligin kórsetken kolledjdiń 8 stýdentine Dóń taý-ken baıytý kombınatyna jumysqa shaqyrý sertıfıkattary tabystaldy.
Bıyl ERG Skills kásibı sheberlik baıqaýynyń biri Pavlodar oblysynyń Aqsý qalasynda Eurasian Resources Group kásiporyndarynyń jas qyzmetkerleri men Kolledjder alıansyna múshe oqý ordalarynda bilim alyp júrgen jastar arasynda úshinshi ret ótti.
Qatysýshylar ERG Skills baıqaýynda tokar isi, dánekerleý tehnologııalary, slesar, eńbekti qorǵaý men hımııalyq taldaý zerthanashysy atalymdarynda Aqsý qara metallýrgııa kolledjinde sheberlik synaqtarynan ótti. Júldeli orynǵa ıe bolǵan stýdentter ERG kásiporyndaryna jumysqa shaqyrtý aldy.
«Baıqaý jumysshy mamandyqtar salasyndaǵy kásibı biliktiliktiń etalony – WorldSkills standarty negizinde uıymdastyryldy. Negizgi ıdeıasy – jastar arasynda jumysshy mamandyqtarynyń mártebesin arttyrý. Baıqaýdy ótkizý «Jumysshy mamandyqtar» jyly aıasynda ózekti bolyp otyr. Bıyl qatysýshylar sany bıyl rekordtyq mejege jetti. Baq synasqan 55 qatysýshynyń arasynda stýdenttermen qatar Pavlodar óńirindegi kásiporyndardyń mamandary bar. ERG kásiporyndary úshin tokar, dánekerleý isi, slesar, eńbekti qorǵaý, zerthana tehnologııalary baǵyttary erekshe mańyzdy. Bul baıqaý joǵaryda atalǵan mamandyqtardy meńgergen mamandardyń kompanııa úshin suranysqa ıe ekenin kórsetti», deıdi Aqsý ferroqorytpa zaýytynyń dırektory Musabek Maqashev.
Stýdentter men ERG kásiporyndarynyń jas mamandary Jaıaý Musa atyndaǵy kópsalaly Aqsý joǵary kolledji, Eýrazııalyq ınnovasııalyq ýnıversıteti joǵary kolledji men Pavlodar mashına jasaý kolledjderi bazasynda elektromontadaý, ónerkásiptegi avtomatıka, qalyptaý isi men CAD ınjenerlik grafıkasynan baq synasty.
«ERG Skills baıqaýy – bilim men daǵdylar synalyp, jas mamandar men stýdentterdiń teorııalyq bilimi men qabileti, qarymy synǵa túsetin kásibı doda. Máselen, aldymen arnaıy baǵdarlamada formany jobalaısyń da, keıin ony óziń qalyptastyrasyń. Sonda ǵana kásipti tolyq meńgerýge bolady. Men osymen úshinshi jyl qatarynan sarapshylar komandasy sapynda baıqaýǵa qatysýshylardyń jumysyn baǵalap kelemin. Qalyptaýshylardyń biliktiligi jyldan-jylǵa artyp keledi. Mundaı saıystar oılaý qabiletin, tártip pen tehnıkalyq sezimtaldyqty damytady. Baıqaý mamandyqty tek kitap betinen ǵana emes, oqyǵanyn tájirıbede kórsetkisi keletin jas mamandarǵa úlken bastama», deıdi kásibı sheberlik baıqaýynyń sarapshysy, ERG Service quıý óndirisiniń ınjener-tehnology Ildar Fazylbekov.
«Qazhrom» TUK AQ Aqsý ferroqorytpa zaýytynyń ýchaske bastyǵy Aleksandr Konevtyń aıtýynsha, qatysýshylardyń deńgeıi joǵary. Degenmen áli de shyńdaıtyn tustary bar. Olar aldaǵy ýaqytta jumys berýshilermen qatym-qatynasyn nyǵaıta túsetin bolady. Barlyq ERG kásiporyndary teorııa men tájirıbe ushtastyǵyna erekshe mán berip, tájirıbeli mamandar jastardy qoldap, aqyl-keńes berip otyrady.
Bıyl Qostanaı oblysynyń Jitiqara jáne Lısakovsk qalalarynda taý-ken quzyrettilikteri boıynsha ótken ERG Skills baıqaýy óndiristegi zamanaýı tájirıbeni pash etse, Rýdnyı qalasynda ótken baıqaýǵa ERG kompanııalar toby kásiporyndarynyń jas qyzmetkerleri, sondaı-aq Kolledjder alıansy men ERG quramyndaǵy Rýdnyı ındýstrıaldy ınstıtýty men kolledj stýdentteri qatysty. Baıqaýǵa qatysýshylardyń árqaısysy kásibı daǵdylarynyń joǵary ekenin kórsetti.
Baıqaý barysynda ERG Temir dıvızıonynyń basshysy Sergeı Kýzmenko ERG kompanııasynyń kásiporyndaryna burynǵydan da tıimdi jáne básekege qabiletti jas kadrlar qajettigin atap ótti. «SSKО́B eleýli strategııalyq jobalardy iske asyrýdy josparlap otyr. Sondyqtan Rýdnyı jastaryn otbasylyq dástúrdi jalǵastyra otyryp, kásiporyndardyń damýyna úles qosýǵa shaqyramyz. Sondaı-aq kásipti meńgergen jastarǵa qaýipsiz eńbek daǵdylaryn úıretýge múddelimiz. Qaýipsizdik – ERG-diń basty qundylyqtarynyń biri jáne qaýipsiz eńbek jaǵdaılaryn jasaý basty maqsatymyz» deıdi ol.
ERG Skills baıqaýy jylda WorldSkills standarttary – jumysshy kásipter salasyndaǵy kásipqoılyq etalony boıynsha ótip keledi. Baıqaýǵa qatysýshylar qandaı da bir qıyndyqtarǵa tap bolǵanyna qaramastan, joǵary kásibı biliktiliginiń nátıjesinde jeńis tuǵyryna jetip, ERG kompanııalarynda jumys isteý múmkindigine ıe bolyp keledi.
