Ekspozısııaǵa Nurmuhammat Imamulynyń qyryq jyldan astam ýaqyt boıy «Akmolınskaıa pravda» gazeti jáne basqa da basylymdardyń fototilshisi bolyp jumys istegen ýaqytta jasaǵan 300-den astam arhıvtik sýreti kiredi. Kórme qala tarıhyndaǵy mańyzdy sátterdi qamtıdy. Atap aıtsaq, alǵashqy shaǵyn aýdandardyń qurylysy, ónerkásiptik nysandardyń ashylýy, tyń ólkeleriniń keńestik astanasynyń kúndelikti ómiri, sondaı-aq mańyzdy áleýmettik jáne mádenı oqıǵalar. Nurmuhammat Imamov soǵysty jáne soǵystan keıingi búkil dáýirdi birge ótkizgen «Kıev» kamerasy onyń aınymas serigi boldy. Ol Ekinshi dúnıejúzilik soǵysta Pe-2 shúıilgish bombalaýshysynda radıoatqysh qyzmetin atqarǵan. Teatr sýretshisi Otanyna oralǵannan keıin radıomehanık jáne retýsher bolyp jumys istedi. Foto ónerine avtor óziniń jeke dápterinde jazǵandaı, «Selınogradtyń mańyzdy oqıǵalaryn tirkeý» úshin sanaly túrde, eresek jasta keldi.
Prezıdent ortalyǵynyń dırektory Baqytjan Temirbolat kórmeniń ashylý saltanatynda mádenı oqıǵanyń qala tarıhy úshin orasan mańyzy bar ekenin atap ótti.
«Qazirgi Astana – tek ákimshilik ortalyq qana emes, ol – bir urpaqtyń Táýelsiz, damyǵan jáne gúldengen Qazaqstan týraly armanyn beıneleıtin rámiz. Elordanyń sáýletinde ulttyq dástúr men zamanaýı tehnologııalar úndesip, onyń tarıhynda – erlik, eńbek jáne jasampazdyq jatyr. Nurmuhammat Imamovtyń fotojumystary – jaı sýret emes. Bul – óz dáýiriniń tynysyn sezine bilgen adamnyń kózqarasy, ózgeristerdi kórip, tarıhty saqtaı alǵan jannyń shynaıy hronıkasy. Onyń obektıvi – bizdi onjyldyqtarmen jeteleıtin jol», dedi ol.
Kórmeniń jeke bólimi 1977 jyly 7 jeltoqsanda Tyń ıgerýshiler saraıynda qoıylǵan jáne jaqynda fotograftyń uly Rınat Imamov sıfrlandyrǵan fotosýretter muraǵatyna arnalǵan. Myńdaǵan muraǵatty saqtaý jáne jarııalaý jumystary jalǵasyp keledi, osy materıaldardyń bir bóligi avtorlyq saıtta da usynylǵan.
Iá, avtordyń fotosýretteri jaı ǵana derekti shejire emes, ýaqyttyń jandy tynysy, dáýirdiń mádenı kodyna aınaldy. Olar ótkenge degen saǵynyshty oıatyp, qazirgi fotograftardy shabyttandyrady, odan bólek tarıhshy-ólketanýshylar jáne qala men eldiń ótkenine qyzyǵýshylyq tanytatyn jandar úshin qundy resýrs ekeni de ras.
Fotohronıkashynyń uly Rınat Imamov atalǵan kórme ákeniń rýhyna degen qurmettiń belgisi ǵana emes, sondaı-aq qalanyń mádenı murasyna qosylǵan úles boldy deıdi.
«Ár fotosýret tutas bir dáýirdi qamtıdy. Munda onyń eń jaqsy týyndylary ǵana emes, sondaı-aq búkil tarıh – qurylys alańdary, merekeler, kósheler, qala turǵyndarynyń bet-beınesi bar. 1962 jyldan bastap sýretter Selınogradtyń kórneki kúndeligi. Sýretterdi kórgen adamdar ózderin, jaqyndaryn, kóshelerin tanyp jatyr. Bul kórme Astana kúnine oraı jáne ákemizdiń týǵan kúni qarsańynda ashylyp otyr. Prezıdent ortalyǵynyń basshylyǵyna erekshe alǵys aıtamyn», deıdi Rınat Imamov.
Sondaı-aq ol fototilshiniń arhıvi óte aýqymdy ekenin aıtty. Aldaǵy jyly N.Imamovtyń júz jyldyǵy qarsańynda taǵy da kórme ashylyp, qordaǵy basqa sýretter de usynylmaq.
Aıta keteıik, Prezıdent ortalyǵyndaǵy kórme 10 tamyzǵa deıin jalǵasady.
