«Abaı» teatr maýsymyn aıaqtady

Ǵasyrlar boıy qalyptasqan kertartpa ádet-ǵuryp pen myl­qaý kúsh, dúleı zamandy aıyptap ótken Abaı oıy, Abaı fılosofııasy jazylǵannan beri arada qansha jyl ótse de, búgingi kórermen úshin de kókeıkestiligin joǵaltqan joq. Kerisinshe ýaqyt­pen birge ózektiligin arttyryp, zamanmen birge jandanyp keledi. Onyń syry – Muhtar Áýezov Abaı taqyryby arqyly kúlli adamzattyq máselelerge qalam tartty. Pesa ómirge kelgennen beri talaı márte sahna kórip, sonsha ret júrekterge jol saldy. Máselen, rejısser Álimbek Orazbekovke deıin de Abaı taqyrybyna soqpaǵan sahna sýretkeri sırek. Áıgili Asqar Toqpanov qoltańbasynan bas­tap, Sh.Aımanov, Á.Mámbetov, Ǵ.Haırýllına, J.Omarov, E.Obaev, N.Jaqypbaı, Á.Orazbekovten beri qaraı da tizbektelip kete beredi. Biz tamashalaǵan spektaklde Aǵa Abaı rólin Qazaqstannyń Halyq ártisi Tilektes Meıramov, Abaı rólin Qazaqstannyń eńbek sińir­gen qaıratkeri Nurken О́teýil somdady.

Jalpy, osy maýsymda teatr kórermen nazaryna jeti qoıy­lym­nyń premerasyn usynypty. Atap aıtqanda, P.Bomarsheniń «Fıgaronyń úılenýi» mýzykalyq komedııasy, T.Ábdiktiń «Parasat maıdany» psıhologııalyq dra­masy, «Ertegi túnniń áýeni» klassıkalyq ertegiler jıyn­tyǵy, J.Álikenniń «Júrek syry. Mahabbatym sen...» dramasy, B.Brehttiń «Sheńber» dramasy, Á.Kekilbaevtyń «Kúı» dramasy, «Qumqala» ertegisi ónersúıer qaýymnyń kóńilinen shyqqan edi.

Sondaı-aq teatr ujymynyń bul maýsymdaǵy shyǵarmashylyq je­tis­tikteri de az bolǵan joq. G.Bıýh­nerdiń «Voısek» dramasy J.Aımaýytulynyń 135 jyldyǵyna arnalǵan «Ertis-Baıan» I respýblıkalyq teatr­lar festıvalinde Júsipbek Aımaýytuly atyndaǵy arnaıy júldege ıe boldy.

Al M.Áýezovtiń «Qaragóz» tragedııasy Aqtaý qalasynda ótken III halyqaralyq «Ábish álemi» teatr festıvalinde arnaıy kórsetilip, kórermenniń zor yqylasyna bólendi.

Roza Muqanovanyń «Bopaı hanym» tarıhı tragedııa­syn­daǵy Bopaı hanym róli úshin Qazaqstannyń eńbek sińir­gen qaıratkeri, aktrısa Leılo Beknazar «Teatr ALL» III halyq­aralyq teatr festıvalinde «Úzdik áıel beınesi» atalymyna ıe boldy. Budan bólek P.Bomarshe­­niń «Fıgaronyń úılenýi» mýzy­ka­lyq komedııa­sy Qazaqstan teatr­ synshylary birlestigi­niń she­shimimen «Jyl mýzyka­lyq qoıylymy» dep tanyldy. Sondaı-aq halyq­aralyq teatr kúnine oraı uıym­das­tyrylǵan «Qallekı tynysy» spektaklder sherýinde sarapshylar sheshimi boıynsha úzdik akter men aktrısalar marapattaldy.

Maýsymnyń aıtýly jańa­lyq­tarynyń biri – «Oqylym» jobasy bolǵanyn da aıta keteıik. Bul joba jańa pesalar men tyń shyǵarmalardy sahnaǵa shyǵarýda mańyzdy ról atqaryp, kórer­men­niń zor qyzyǵý­shy­ly­ǵy­na ıe boldy. Joba aıasynda jeti jańa týyndynyń oqylymy ótti.

Teatrdyń Sımfonııalyq or­kestri men Halyq aspaptar ansambli de kórermen nazaryna kon­serttik baǵdarlamalaryn usynyp, repertýardaǵy mýzyka­lyq qoıylymdardy súıemeldeý arqyly kórkemdik deńgeıiniń artýyna úles qosty.

Sonymen qatar teatr ujymy gastroldik saparmen Qaraǵan­dy, Kókshetaý, Pavlodar, Almaty qalalaryna bardy.

Osy maýsymda teatr reper­týary boıynsha 165 spektakl sahnalanyp, jalpy 42 112 kórermen tamashalady.

Kelesi maýsymda da teatr ujy­my kópshilikke jańa premeralar men shyǵarmashylyq jobalardy usynýdy jalǵastyrady.