О́ndiristi ashqan azamattar áýeli salany eki jyldaı asyqpaı zerttepti. Túrkııaǵa baryp, mamandarmen tájirıbe almasqan. Eń bir tıimdi tusy – qajetti shıkizattyń 60%-dan astamy osy Araldan tabylǵany. Aýdandaǵy tuz ken ornyndaǵy natrıı hlorıdi qospasy qajetterine jarady. Qalǵan 40% shıkizatty Túrkııadan jetkizip otyr. Byltyr «Damý» qorynyń qoldaýymen jeńildetilgen sýbsıdııa alyp, kópten josparlaǵan jobasyn iske asyrýǵa kiristi. Zaýyt dırektory Jubanysh Amanjolov buryn farmasevtıka salasynda jumys istep, kommersııalyq nysandardy jalǵa berýmen de aınalysypty.
«Degenmen otandyq óndiristiń orny bólek qoı. Ony ómirsheń qylý ózimizge baılanysty. Osy isti bastamas buryn Túrkııaǵa tapsyrys berip, gıgıenalyq zattar shyǵardyq. Biraz tájirıbe tolystyryp, memleket qoldaýymen is bastap jatyrmyz. Alda ylǵal maılyqtar shyǵaratyn taǵy bir qondyrǵy ornatý josparda bar. TMD elderinde tolyq avtomattandyrylǵan ondaı jeliniń balamasy joq. Qarajatyn tólep, qondyrǵynyń kelýin kútip otyrmyz. Qazir 10 adamdy jumyspen qamtyp, táýligine 22 tonnaǵa deıin ónim shyǵaramyz. Ár aýdanǵa kedergisiz jetkizilip jatyr. Bizdiń ónimdi tutynatyndar qatarynda Almaty men Astana da bar», deıdi Jubanysh Amanjolov.
Turmystyq hımııa naryǵynda otandyq óndirýshiler az. Mysaly, osy zaýyt – bul baǵyttaǵy elimizdegi úshinshi zaýyt.
Araldaǵy óndiris orny ókilderi Astanada kórmege barǵanda buryn jumys istep turǵandardyń ózi suıyq túrin ǵana shyǵaratynyn baıqapty.
Zaýyt dırektory qurǵaq untaqtyń tehnologııalyq úderisi kúrdeli ekenin aıtady. Sondyqtan bizdiń tutynýshylar qoldanatyn osy ónimniń 97%-y syrt memleketterden keledi.
«Bizdiń bastama – ımportty almastyratyn joba. Osy arqyly Reseıden kelip jatqan ónimder úlesin azaıtqymyz keledi. Taǵy bir aıta keterligi, biz oktan sany boıynsha 15 aktıvke deıin ónim shyǵara alamyz. Syrttan osyndaı sapadaǵy taýar kelse kedendik baj salyǵynan onyń quny aspandap, eshkim almaı qoıady. Sondyqtan olar oktan sany bar bolǵany 5 aktıvtik ónimin kirgizip otyr. Sonyń ózinde baǵasy olardan 3 ese sapaly bizdiń taýarmen birdeı. «Easy Life» jáne «Aral» brendterimen shyǵatyn bizdiń ónim básekege qabiletti dep senimmen aıta alamyz. Astana qalasynda ótken kórmege aparǵan 3 tonna tez ótip ketti. Alda otandyq óndirýshilerdiń biryńǵaı reestri qalyptassa, jumysymyz jandana túsedi degen úmit bar», deıdi kásipker.
О́ńirde 2022–2024 jyldary kásipkerlikti qoldaýǵa túrli kózderden 206 mlrd teńge ınvestısııa tartylyp, 16 700 joba qarjylandyrylǵan. «Ase Invest» – osyndaı qoldaý nátıjesinde jumysyn bastaǵan jobalardyń biri. Jergilikti shıkizatty paıdalanyp, óńdeý ónerkásibiniń damýyna úles qosatyn óndiris orny jergilikti azamattardy turaqty jumyspen qamtamasyz etedi. Ylǵal maılyq shyǵaratyn qondyrǵy iske qosylǵanda, zaýyt jumysshylarynyń qatary 30 adamǵa jetedi.
Qyzylorda oblysy,
Aral aýdany
