Foto: Ashyq derekkóz
Eń aldymen, Mádenıet jáne aqparat mınıstriniń buıryǵymen jýrnalıstiń beıbit jıyndarda jumys isteý tártibi jáne olardy tanýǵa arnalǵan arnaıy aıyrym belgileriniń úlgisi bekitildi. Bul sheshim – jýrnalısterdiń qoǵamdyq is-sharalarda kásibı mindetin qaýipsiz ári erkin atqarýyna quqyqtyq negiz beretin mańyzdy qujat. Endi kez kelgen mıtıng, sherý nemese jınalys kezinde jýrnalısterdiń róli men jaýapkershiligi naqty belgilenip, olardyń qaýipsizdigine kepildik beriledi.
Sonymen qatar, Qazaqstan Respýblıkasy Parlamenti jańa salyq kodeksin qabyldap, otandyq merzimdi baspa basylymdary úshin qosylǵan qun salyǵynyń jeńildetilgen mólsherlemesin – 10% kóleminde qoldaný týraly normalardy engizdi. Bul jeńildik elimizdegi gazet-jýrnaldardyń qarjylyq jaǵdaıyn jeńildetip, sapaly basylymdardyń ómirsheń bolýyna yqpal etedi. Baspa óniminiń baǵasyn kótermeı, ony keń aýdıtorııaǵa qoljetimdi etip usynýǵa múmkindik beredi.
Halyqtyń medıasaýattylyǵyn arttyrý jáne medıa mamandarynyń biliktiligin kóterý maqsatynda 2025 jylǵa deıingi keshendi Jospar bekitildi. Mınıstrliktiń málimetinshe, jospar aıasynda jyldyń alǵashqy jartysynda birqatar naqty ister júzege asty. Atap aıtqanda, salalyq jýrnalıstıkany damytý baǵytynda 8 oqytý is-sharasy uıymdastyrylyp, olarǵa 600-den astam buqaralyq aqparat quraldary ókilderi men jýrnalıstıka mamandyǵynda oqıtyn stýdentter qatysqan. Sonymen qatar ortalyq memlekettik organdardyń, jergilikti atqarýshy bıliktiń jáne kvazımemlekettik qurylymdardyń 400-ge jýyq baspasóz hatshysy osy oqytýdan ótti.
Budan bólek, elimizdiń jetekshi joǵary oqý oryndarymen salalyq jýrnalıstıkany damytýǵa arnalǵan 10 memorandýmǵa qol qoıyldy. Bul memorandýmdar bilim júıesi men praktıkalyq medıajumysty biriktirip, bolashaq jýrnalısterdi naqty naryq talaptaryna saı daıarlaýǵa múmkindik beredi.
