Basqosýǵa Túrkııa, Nıderlandy, Reseı, Qyrǵyzstan, О́zbekstan sekildi elderden jáne Qazaqstannyń ár óńirinen abaıtanýshylar, ádebıettanýshylar, fılosoftar men tarıhshylar jınaldy.
Konferensııanyń ashylýynda oblys ákimi Berik Ýálı, QR Ǵylym jáne joǵary bilim mınıstri Saıasat Nurbek, Muhtar Áýezovtiń nemeresi, túrkitanýshy ǵalym Zıfa-Alýa Muratqyzy, L.N. Gýmılev atyndaǵy Eýrazııa ulttyq ýnıversıtetiniń rektory Erlan Sydyqov quttyqtaý sóz sóıledi.
Berik Ýálı Memleket basshysy Qasym-Jomart Toqaevtyń «Abaı jáne HHI ǵasyrdaǵy Qazaqstan» maqalasynda aıtylǵan: «Abaıdy qalaı dáriptesek te jarasady. Onyń ǵıbratty ǵumyry men shynaıy shyǵarmashylyǵy – qazaq halqynyń ǵana emes, jahan jurtyna da úlgi-ónege» degen sózin eske alyp, konferensııanyń maqsaty – uly oıshyldyń rýhanı murasyn tereń zertteý, ony qazirgi zaman turǵysynan paıymdaý jáne Abaı iliminiń ulttyq sana qalyptastyrýdaǵy, bilim men tárbıedegi, tulǵa damytýdyń mádenı-fılosofııalyq negizin aıqyndaý ekenin atap ótti.
Jıynda Túrkııadaǵy Pamýkkale ýnıversıtetiniń professory Nergız Bıraz, Nıderlandydan kelgen túrkitanýshy Robert Ermers, fılologııa ǵylymdarynyń doktorlary Tursyn Jurtbaı men Arap Espenbetov jáne ózge de ǵalymdar baıandama jasady.
Konferensııa aıasynda 9 jańa kitaptyń tusaýkeseri ótti. Solardyń qatarynda belgili ádebıettanýshy, Ádebıet jáne óner ınstıtýtynyń dırektory Kenjehan Matyjanov qurastyrǵan «Abaı shyǵarmalarynyń úsh tomdyq akademııalyq jınaǵy» bar. Sondaı-aq, «Abaı» baspasynan mereıtoıǵa oraı jaryq kórgen birqatar týyndy alǵash ret oqyrmanǵa usynyldy. Olardyń ishinde ǵalym, mádenıettanýshy Bazarbek Atyǵaıdyń «Abaıdyń aýdarma mektebi» monografııasy, «Sheıit» jınaǵy, Ahat Shákárimulynyń «Jalynǵa malǵan júregin» kitaby, Áset Medeýhanulynyń «Halıolla» hıkaıaty, Danııal Ysqaqovtyń shyǵarmalar jınaǵy, sondaı-aq Shákárim ýnıversıteti mamandary ázirlegen AR «Qarasóz» kitaby bar.
Bul týyndylar kópshilikke alǵash ret tanystyrylyp otyr.
