Búgin aqyn mereıtoıyna arnalǵan onkúndiktiń toǵyzynshy kúninde aksııa aıasyndaǵy alǵashqy nysannyń qurylysy bastaldy. Mańǵystaý oblysy Semeı qalasyna Dostyq úıin salyp bermek. Nysannyń irgetasyn qalaý rásimine oblys ákimi Berik Ýálı, Mańǵystaý oblysynyń ákimi Nurdáýlet Qılybaev bastaǵan delegasııa qatysty.
Jańa nysan 75 myń turǵynǵa arnalǵan «Semey Smart City» shaǵyn aýdanynda boı kóteredi. Etnomádenı birlestikter men qoǵamdyq uıymdardyń basyn qosatyn, 3 qabatty kópfýnksıonaldy mádenı keshen birneshe fýnksıonaldyq bloktan turady. Kitaphana, qoldanbaly óner murajaıy, fotozerthana, kórkemóner jáne qalpyna keltirý sheberhanalary, kınozal, konferensııa zaldary qarastyrylatyn bolady.
Aımaq basshysy ǵımarattyń irgetasyn qalaý rásiminde Memleket basshysy Qasym-Jomart Toqaevtyń bastamasyn alǵash bolyp qoldaǵan Mańǵystaý oblysynyń halqyna alǵysyn jetkizdi.
«Búgin «Abaıǵa qurmet» aksııasy aıasynda Mańǵystaý oblysynyń óńirimizge syılyǵy Dostyq úıiniń irgetasyn qalaǵaly otyrmyz. «Dostyq» úıi sımvolıkalyq máni óte zor, eki aımaqtyń dostyǵyn bildiretin ǵımarat bolmaq. Búgingi ıgi shara elimizdiń qos qıyrynyń birligi men ulttyq biregeıliginiń jarqyn kórinisi dep bilemin. Mańǵystaý men Abaı oblysy batys pen shyǵys shekarada jatqan shalǵaı aımaq bolsa da, nıeti ortaq, tileýi bir ekenin búkil Alash jurtyna kórsetti. Mańǵystaý oblysy azamattarynyń eldiń sálemin alyp, Abaı toıynyń ústinde qurylysty bastaýy úlken qurmetke laıyq» dedi aımaq basshysy.
Mańǵystaý oblysy delegasııasynyń atynan memlekettik qyzmet salasynyń ardageri, Mańǵystaý oblysynyń Qurmetti azamaty Darjok Seıbaǵytov sóz sóıledi.
«Uly Abaıdyń 180 jyldyq mereıtoıy qutty bolsyn! Búgingi shara – bolashaqtyń sharasy. Bolashaq búginnen bastalady. Búgin mine shaǵyn qalanyń irgetasy qalanǵaly tur. Meniń oıymsha, bul bastamany Mańǵystaý ǵana emes, Qazaqstannyń basqa aımaqtary da qoldaıdy dep oılaımyn» dedi ol.
Ǵımarattyń irgetasyn qalaý rásiminde Qoǵamdyq kelisim ortalyǵy-oblystyq úıiniń dırektory Nadejda Sharova men Abaı oblysy Qazaqstan Halqy Assambleıasy ǵylymı saraptamalyq tobynyń tóraǵasy Aırat Bazenov Mańǵystaý jurtshylyǵyna óńir turǵyndary atynan alǵys aıtty.
Sondaı-aq, «Abaıǵa qurmet» aksııasy aıasynda Shymkent qalasy shyǵarmashylyq ortalyǵyn, Túrkistan oblysy kórme ortalyǵyn, Astana qalasy keleshek mektebin, Aqtóbe oblysy jekpe jek ortalyǵyn, Pavlodar oblysy Ústel tennısi ortalyǵyn salýdy, Shyǵys Qazaqstan oblysy Ertis jaǵalaýyn abattandyrýdy josparlap otyr.
