Almatyda mundaı shaǵyn saýda oryndarynyń sany 3,5 myńnan asady. Kásip ıeleri júktemeniń artyp, erejelerdiń únemi ózgerip jatqanyna alańdaýly. Kásipkerler eki negizgi problemaǵa toqtaldy. Birinshisi – 4 paıyz kólemindegi bólshek salyq. Shaǵyn dúken ıeleri rentabeldilikti saqtap qalý úshin ony 2 paıyzǵa deıin tómendetýdi talap etýde. Sondaı-aq olardy sıfrlandyrý jáne mobıldi aýdarymdar máselesi tolǵandyrady. Aýdarymdardy baqylaýǵa baǵyttalǵan jańa erejeler de alańdatýda. Banktik komıssııa mólsheri 5 paıyzǵa deıin jetip, kásipkerlerdiń tabysyn azaıtady. Salyqtyq júktemeniń artýy men jańa talaptardyń engizilýi sózsiz baǵanyń kóterilýine ákelmek, al mundaı saýda núktelerindegi baǵa deńgeıi qala turǵyndarynyń satyp alý qabiletine tikeleı áser etedi.
Qazir jekelegen dúkender eskirgen úlgimen jumys isteýde. Kún saıyn otyzǵa jýyq bastapqy qujat toltyrýǵa, salystyrý aktilerin rásimdeýge jáne qolma-qol emes tólemderdi júrgizýge májbúr. Zańdy ári jeńil túrde bıznes júrgizýge arnalǵan quraldar joq. Sarapshylardyń pikirinshe, naryqty kóleńkeden shyǵarý úshin bıznesti avtomattandyrý, biryńǵaı ortalyqtandyrylǵan satyp alý júıesin qurý, býhgalterlik aýtsorsıng pen kadrlyq aýdıtti engizý sııaqty júıeli qadamdar qajet.
Aıtýar Qoshmambetovtyń aıtýynsha, dál osyndaı máseleler talqylanýǵa tıis. Onyń sózinshe, shaǵyn bıznes túsinikti ári ádil erejelermen jumys isteýi kerek, al qazirgi jaǵdaıda olar tek qysymǵa shydap, kún kórýde.
– Eger bólshek saýda salyǵy men sıfrlandyrý máselesin kásipkerlermen ashyq dıalog arqyly sheshpesek, tutas bir naryq segmentinen aıyrylyp qalýymyz múmkin. Al ol degenimiz – jumys oryndary, salyq túsimi jáne halyq úshin taýardyń qoljetimdiligi. «Úı janyndaǵy dúkender» erteńine senimdi bolýǵa tıis, – dedi Májilis depýtaty.
Sapar aıasynda depýtat IT-kompanııalardyń, Almaty qalasy Qoǵamdyq keńesiniń múshelerimen kezdesip, Ortalyq Azııa franchaızıng qaýymdastyǵy uıymdastyrǵan is-sharaǵa qatysty. Sondaı-aq azamattardy jeke qabyldaý ótkizdi. Kezdesýler barysynda salyq júktemesi, kásipkerlikti qoldaý jáne naryqtaǵy barlyq qatysýshy úshin teń jaǵdaı jasaý máseleleri talqylandy.
