Ortaǵasyrlyq musylman-mysyr tarıhshylarynyń jazbasynda «Án-Nasyr bın Qalaýyn» atymen tanymal bul tulǵanyń ıslam órkenıeti úshin sińirgen eńbegi eren. Shyǵystanýshy hám arabtanýshy Qaırat Sákı, 2006 jyly jaryq kórgen «Qypshaq mámlúkteri» atty kitabynda: «Qalaýyn sultan 1228–1230 jyldary dúnıege kelgen. Shamamen ataqty Baıbarys sultannan 5–6 jas kishi» deı otyryp, ortaǵasyrlyq tarıhshy ál-Aınıdiń (1361–1451) jazbasynda aıtylǵan «Qalaýyn sultannyń ulty taza qypshaq berish taıpasynan» degen derekti alǵa tartady.
Ol sııaqty mámlúktanýshy – ǵalym sol zaman oqymystysy Baıbarys ad-Daýadar degen shejireshi jazyp qaldyrǵan «Zýbdatý al-fıkra fı tarıhı al-hıdjra» («Hıdjra tarıhy jónindegi oıdyń qaımaǵy») atty kólemdi eńbekte: «Qalaýynnyń tegi taza qypshaq belgili berish uǵly taıpasynan» deıdi.
Qaı jaǵynan alsaq ta Qalaýyn sultan Qypshaq dalasynyń ulany ekeni anyq. О́ıtkeni ataqty tarıhshy Ibn Abdýzahırdiń jazbasynda, Qalaýyn sultannyń arabsha óte az biledi, sóıte tura túrki-qypshaq tilinde asa sheshen sóıleıdi degen derek bar.
Bul tulǵa bılik qurǵan zamanda ataqty Baıbarys sultannyń kresshilermen jasasqan 10 jyldyq beıbitshilik bitimi aıaqtalǵandyqtan, ejelgi jaýlyq qaıtadan óristeıdi. Sol sebepti, 1281 jyly joryq bastaǵan Qalaýyn ıstıptardyń ordeni ornalasqan Marqab qalasyn basyp alady. Osy ekpinmen ilgerilegen mámlúk áskerleri kresshilerdiń basty ordalary Latakııa jáne Trıpolı shaharlaryn baǵyndyrady. Osylaı óz ıeligin keńeıtken sultan ejelgi jurty Deshti Qypshaq dalasyndaǵy Altyn Orda ulysymen baılanys ornatady.
