Xinhua agenttigi kezdesýdi tarıhı kontekste qarastyrdy. Jýrnalıster Toqaevtyń sapary Ekinshi dúnıejúzilik soǵystaǵy Jeńistiń 80 jyldyǵyna arnalǵan is-sharalarmen tuspa-tus kelgenin atap ótti. Qytaı úshin bul sımvoldyq mánge ıe: mundaı sharalarǵa Qazaqstannyń qatysýy eki eldiń jaqyndyǵyn jáne qarym-qatynastyń senimdi sıpatyn aıǵaqtaıdy. Negizgi nazar Sı Szınpınniń: «Álemde qandaı ózgerister bolmasyn, Qytaı men Qazaqstan tatý kórshilik saıasatyn ustanyp, ádiletti halyqaralyq tártip ornatýǵa kúsh salýy kerek» degen sózine aýdaryldy.
CGTN telearnasy múlde basqa qyryn alǵa tartty. Onda kelissózderdiń naqty nátıjeleri basty nazarǵa shyqty. Kórermenderge taraptardyń 20-dan astam kelisimge qol qoıǵany eske salyndy: energetıka men tehnologııadan bastap, bilim berý, sport jáne jabaıy tabıǵatty qorǵaýǵa deıin. CGTN Toqaevtyń: «Qazaqstan men Qytaı qarym-qatynastary tarıhtaǵy eń joǵary deńgeıge jetti» degen sózine silteme jasady, sondaı-aq ótken jylǵy rekordtyq saýda kórsetkishterin keltirdi.
«Astana men Pekın bir-birin batyl qoldap, yntymaqtastyqty jańa deńgeıge shyǵarý kerek», — dep atap ótti Sı Szınpın.
Gov.cn memlekettik portaly bolsa, jaǵdaıdy áldeqaıda ustamdy baıandady. Onda qol qoıylǵan qujattar jaıly egjeı-tegjeı aıtylmaı, dıplomatııalyq tujyrymdarǵa ǵana toqtaldy.
«Halyqaralyq jaǵdaıdaǵy ózgeristerge qaramastan, Qytaı men Qazaqstan árqashan tatý kórshi ári seriktes bolyp qala beredi», — dep keltiredi resýrs Qytaı basshysynyń sózin.
Al QHR Syrtqy ister mınıstrligi óz málimdemesinde seriktestiktiń strategııalyq sıpatyna erekshe ekpin jasady. Mınıstrliktiń paıymynsha, Qytaı men Qazaqstan — «bir-birine senip, arqa súıeı alatyn kórshiler». Sondaı-aq energetıkalyq yntymaqtastyq, kólik dálizderin damytý jáne mádenı almasýlardyń mańyzdylyǵy bólek atap ótildi. Ásirese eki el arasyndaǵy Mádenı almasý jylynyń qarsańynda munyń máni zor ekeni kórsetildi.
Jalpy, qytaılyq jetekshi BAQ-tardyń barlyǵy ortaq oıǵa toǵysty: Sı Szınpın men Qasym-Jomart Toqaevtyń kezdesýi strategııalyq áriptestikti nyǵaıtýdyń mańyzdy qadamy boldy. Alaıda ár basylym óz qyrynan kórsetti: Xinhua — sımvoldyq sabaqtastyq turǵysynan, CGTN — naqty jetistikter turǵysynan, al gov.cn men Qytaı SIM — ustamdy dıplomatııalyq til arqyly.
