Kúre jol boıyndaǵy qonaqúı

Oblystaǵy halyq­ara­lyq mańyzy bar «Batys Eýropa – Batys Qytaı» avtojoly boıynda tuńǵysh ret zamanaýı qonaqúı paıdalanýǵa berildi. Merki aýdanyna qarasty Aqtoǵan aýylynyń mańynda boı kótergen jańa nysan Prezıdent tapsyrmasyna sáıkes Úkimet janyndaǵy ınvestısııalar tartý jónindegi keńeste maquldanǵan «Qazaq Oil-dyń 2025–2029 jyl­darǵa arnalǵan jol bo­ıyndaǵy
60 qonaqúı» baǵdar­lamasy aıasynda salynǵan.

«Keruen Inn» qonaqúıi to­lyqtaı jeke ınvestısııalar esebinen qarjylandyrylǵan. Joba jetekshileriniń aıtýynsha, kúre joldyń boıyndaǵy jaıly qonaqúıde kelýshilerdi qabyldaýǵa barlyq múmkindik qa­rastyrylǵan. Resmı derekke sensek, mundaı zamanaýı qonaqúıler jelisi týrıstik áleýeti joǵary óńirlerde, shekara beketterine jaqyn mańdarda da boı kóteredi eken.

«El Prezıdenti Qasym-Jomart Toqaevtyń bastamalary qaı kezde de nazarymyzdan tys qalǵan emes. Memleket bas­shysynyń tapsyrmasyna saı elimizde kólik-logıstıkalyq ın­fra­qurylymyn damytý, halyqqa sapaly qyzmet kórsetý baǵytynda aýqymdy jumys atqarylyp jatyr. Jambyl óńirinde de osy baǵytta qolǵa alynǵan jobalar az emes. Olardyń bir­qata­ry júzege asyrylyp jatyr. Sonyń arqasynda óńirimizde ýaqyt suranysyna saı keletin ser­vıstik keshender sany arta tústi. Mundaı qonaqúı jelileri ersili-qarsyly aǵylǵan halyqqa qolaıly jaǵdaı jasaýmen qatar, jergilikti turǵyndardyń jańa jumys ornymen qamtylýyna múmkindik týǵyzady. Sondaı-aq kásipkerlikti damytýǵa jol ashady. Osyndaı ıgi bastamalar el ekonomıkasynyń ósýine, azamattardyń ál-aýqatynyń artýyna aıtarlyqtaı úles qosady», deıdi oblys ákiminiń orynbasary Ábilhaıyr Tamabek.

Merki aýdanynyń aýmaǵynda salynǵan jańa qonaq­úıdiń ashylý saltanatyna «Qazaq Oil» kompanııasynyń bas dırektory Tólemis Shotanov, «QazAvtoJol» UK» AQ-nyń basqarma tóraǵasy Darhan Ima­nashev bastaǵan mártebeli meı­mandar qatysyp, oılaryn ortaǵa saldy. Olardyń aıtýynsha, mundaı servıstik keshender el ekonomıkasynyń eselenýine súbeli úles qosady.

Joba jetekshileri keltirgen derekke júginsek, «Keruen Inn» qonaqúıinde saparda júr­gen azamattardyń alańsyz ty­nyǵýyna barlyq múmkindik qarastyrylǵan. Jalpy aýmaǵy 900 sharshy metr­den asatyn nysanda 31 standart nómiri bar. Ár nómir jeke sebezgi ból­­mesimen, sanıtarlyq torappen, teledıdar, tegin
Wi-Fi jelisimen jabdyqtalǵan. Qonaqtarǵa qajetti barlyq qo­laı­ly jaǵdaı jasalǵan, sonyń ishinde gıgıenalyq quraldar da qarastyrylǵan.

Kúre jol boıynda ornalasqan keshen aýmaǵynda keń mázir usynatyn meıramhana, kúzetpen qamtylǵan avtoturaq, kir jýý qyzmeti, jolǵa qajetti taýarlar dúkeni, janarmaı quıý stansasy, elektr kólikterine arnalǵan qýattaý beketi bar. Jańa jobany júzege asyrǵan «Qazaq Oil» kompanııasy elimizde zamanaýı jol boıy servısiniń biryńǵaı ekojúıesin qalyptastyrýdy maqsat etip otyr. Osy baǵytta atqarylatyn jumys az emes. Bul keshen bastamasy ǵana.

Joba jetekshileriniń aıtýynsha, aıasynda boı kóteretin barlyq nysan halyqaralyq stan­dart­tarǵa saı salynyp, energııa tıimdiligi talaptaryn saqtaıtyn bolady.

«Men shilde aıynda týrıstik jerlerdiń barlyǵyn retke keltirý týraly tapsyrma berdim. Bul jumys jeke ba­qy­laýymda. Jurt jıi baratyn demalys oryndarynan bólek, bolashaǵy zor basqa da baǵyt­tardyń áleýetin arttyrý mańyzdy. Mindetterdiń ara-jigin ajyratyp alǵan jón. Jergilikti atqarýshy organdar árdaıym týrızm ınfraqurylymyn jan-jaqty damytýǵa basa mán berip, osy jumysqa jaýapty bolady. Qazirde bul baǵyttaǵy eń ózekti másele – zamanaýı ınfra­qurylym salý. Eger osy mindetti oıdaǵydaı oryndasaq, elimizdiń kýrorttary jer júzine tanylyp, Qazaqstannyń betke ustar ulttyq brendi bolmaq», degen Prezıdent tapsyrmasy jergilikti atqarýshy bıliktiń árdaıym nazarynda.

Merki jerine keletin adam sany eshqashan sıregen emes. Sondyqtan da munda kólik-lo­gıs­­tıkasyn damytýdyń ma­ńy­zy zor. Aýdan aýmaǵynda boı kó­tergen jańa qonaqúı týrısterdi qabyldaýǵa daıyn. Jańa keshen ýaqyt suranysyna saı salynǵan.

Jalpy, Merki aýdanynda qupııasy áli kúnge deıin ashyl­maǵan «Kókkól» bastaǵan ózge de kórikti jerler jetkilikti. Aýdan aýmaǵynda jaqynda alǵash ret erekshe qorǵalatyn tabıǵı aýmaq mártebesine ıe «Merki» memlekettik óńirlik tabıǵı parki quryldy.

Merki tórinde Qyzyl kitap­qa engen janýarlar jortyp júrgenin, mundaǵy taýda kóptegen tarıhı oryndar bar ekenin es­ker­sek, aýdanda ekologııalyq týrızmdi órkendetýge de múmkin­dik mol. Sol turǵyda ýaqyt sura­nysyna saı keletin servıstik ke­shenderdiń sany arta túskeni jón.

Jambyl oblysy,

Merki aýdany