Sýretti túsirgen – Aqádil RYSMAHAN
Oblys ortalyǵy Taraz qalasyna qarasty Qumshaǵal turǵyn alabynda 8 myńǵa jeteǵabyl halyq qonystanǵan. Turǵyndar tyǵyz shoǵyrlanǵan Qumshaǵalǵa ýaqyt talabyna saı keletin rýhanııat ordasy kerektigi ilgeride jıi aıtylatyn. Jergilikti atqarýshy bılik ókilderi halyqtyń ótinishin nazardan tys qaldyrmaı, byltyr jyl sońynda mádenıet úıiniń qurylysyn bastaǵan. Endi sol jańa nysan paıdalanýǵa berildi.
Turǵyn alabynda boı kótergen mádenıet úıiniń ashylý saltanatyna óńir basshysy Erbol Qarashókeev arnaıy baryp, qumshaǵaldyqtardyń qýanyshyna ortaqtasty. О́z kezeginde jergilikti turǵyndar 140 oryndyq mádenıet úıiniń boı kóterýine yqpal etken bılik ókilderine rızashylyǵyn jetkizip, aqjarma tilegin aıtty.
«Mádenıetsiz el de, ult ta bolmaıdy. О́ıtkeni mádenıet – halyqtyń rýhanı qazynasy. О́neri óristegen óńirde mádenıet salasynyń qyzmetkerlerine qoldaý toqtamaq emes. Sebebi Jambyl jeri – ulttyq deńgeıdegi mádenıet maıtalmandaryn dúnıege ákelgen óńir. Biz tuǵyrly tulǵalarymyzdy qaı kezde de maqtan tutamyz. Jergilikti atqarýshy bılik ókilderi sala qyzmetkerleriniń ótinishin nazardan tys qaldyrmaıdy. Qasıet daryp, qut qonǵan Áýlıeata jerinen, Taraz topyraǵynan talaı jas daryn túlep ushqan. Sol dástúr sabaqtastyǵynyń jalǵasýyna qoldan kelgenshe jaǵdaı jasaımyz. Qumshaǵalda boı kótergen jańa ǵımarattaǵy mamandar jas urpaqtyń rýhanı muramen sýsyndaýyna, ulttyq ónerdiń óristeı túsýine barynsha múddelilik tanytady dep senemiz. Munda jastardyń shyǵarmashylyq daǵdysyn damytýǵa barlyq jaǵdaı qarastyrylǵan. Endi tek aıanbaı eńbek etý kerek», dedi óńir basshysy.
Resmı derekke júginsek, bıyl óńirde 16 mádenıet nysanynyń qurylys jumysyn júrgizýge qomaqty qarajat qarastyrylǵan. Qazirge deıin 5 nysan paıdalanýǵa berilgen. Jyl sońyna deıin taǵy 6 nysannyń qurylysy aıaqtalady.
«Sońǵy ýaqytta Qumshaǵalǵa aıryqsha kóńil bólinip jatyr. Birneshe áleýmettik nysan salyndy. Jergilikti jurt asyǵa kútken mádenıet úıi de boı kóterip, turǵyndar úshin esigin aıqara ashty. Turǵyndardyń tilegin qaperden shyǵarmaǵan óńir basshysy Erbol Qarashókeev pen Taraz qalasynyń ákimi Baqytjan Orynbekovke aıtar alǵysymyz sheksiz. Eki azamat bir jyl buryn Qumshaǵalda mádenıet oshaǵy boı kóteredi degen ýáde berip edi. Búgin sol ýádeniń údesinen shyǵyp, qýanyshymyzdy bólisip otyr. Ýaqyt suranysyna saı salynǵan jańa nysan jastardyń bas suǵatyn qasıetti shańyraǵyna aınalady degen senim zor», deıdi qumshaǵaldyq qarııa Rahmenbek Rysdáýletuly.
Mádenıet úıiniń qurylys jumysy ótken jyldyń qarasha aıynda bastalyp, qazynadan 363 mln teńge qarajat bólindi. Jumysty «Ál-Mansur» JShS júrgizgen. Mádenıet oshaǵy ýaqyt talabyna saı salynǵan. Munda dekorasııa qoımasy, ákimshilik bólme, kitaphana, 12 oryndyq oqý zaly bar. Sondaı-aq balalar men jastardy shyǵarmashylyqqa baýlıtyn birneshe úıirme jumys isteıdi.
TARAZ
