Áýeli Tarazdaǵy Sheraǵa eskertkishine gúl shoqtaryn qoıǵan qalamgerler Myńbulaqqa asyqty. Talaptydaǵy Sheraǵańnyń shańyraǵyna jetken soń árisi Astana, berisi Almatydan kelgen qalamgerler qaıratker-jazýshy týraly estelikterin aıtyp, emen-jarqyn áńgimeniń tıegin aǵytty. Sherhan Murtazanyń memorıaldyq úıindegi jazýshynyń muralarymen, tarıhı sýretterimen tanysty.
«Sheraǵanyń shekpeninen shyqqan» qalamgerler shoǵyry qazirgi kezde ult rýhanııatynyń bir-bir betkeustaryna aınalǵany málim. Olar qazaq kórkemsóziniń abyroıyn kóterip, ádebıettiń damýyna áli de óz úlesterin qosyp júr. Sondyqtan jıynda Sheraǵa men ol kisiniń «shekpeninen shyqqan» ádebıet ókilderiniń rýhanı muralaryn dáripteý, ustaz ben shákirt arasyndaǵy taǵylymdy baılanysty keıingi býynǵa nasıhattaý is-sharany uıymdastyrǵan rýhanııat jáne tarıhtaný ortalyǵynyń negizgi mindetine aınalǵandaı kórindi.
Ádebı keshti qalamger Kósemáli Sáttibaıuly júrgizdi. Oblys ákimdiginiń mádenıet jáne tilderdi damytý basqarmasynyń basshysy Erlan Júnisbaı oblys ákimi Erbol Qarashókeevtiń quttyqtaý hatyn oqyp berdi.
«Is-sharany biz kópten beri josparlap, osy jyly Sheraǵanyń týǵan kúnine oraı ótkizýdi jón kórdik. Aldaǵy ýaqytta da bul bastamany dástúrge aınaldyryp, uly jazýshynyń týǵan kúninde Myńbulaqtyń tórinde jyl saıyn ótkizýge nıettimiz» delingen quttyqtaý hatta. Sondaı-aq «Áýlıeata – kitap oqıtyn óńir» jobasy aıasynda «Sheraǵa shekpeninen shyqqan» qalamgerlerdiń ustazdary týraly taǵylymy mol estelikterin jınaqtap, jeke kitap etip shyǵarǵany jazylǵan.
Talaptyǵa at basyn burǵan qalamgerlerge qurmet kórsetildi. «Sheraǵanyń shekpeninen shyqqandar» atty estelik kitap tabystaldy.
Kesh barysynda jazýshylyq pen jýrnalıstıkany qos qanatyndaı serik etken shákirtteri – Memlekettik syılyqtyń laýreaty, jazýshy Kádirbek Segizbaev, qalamgerler Janat Elshibek, Ámirhan Meńdeke, Nurǵalı Oraz, Maǵıra Qojahmetova, Qaıyrbek Asanov, Talǵat Aıtbaıuly, «Jalyn» jýrnalynyń bas redaktory Qudııar Bilál, Qazaqstannyń eńbek sińirgen qaıratkeri, pýblısıst Qaınar Oljaı, Gúlzeınep Sádirqyzy bastaǵan azamattar estelikterimen bólisip, ortalyqqa jeke jınaqtaryn tabystady.
Sheraǵa shańyraǵyndaǵy keshke kelgen shákirtteri qalamger týǵan aýylǵa Sherhan Murtaza esimin berý týraly usynys aıtty. О́zge de utymdy ıdeıalar áńgimege arqaý boldy.
«Pýshkın dúnıeden ozǵanda Gogol qaıǵyryp turyp: «Pýshkın óldi, Reseı jetim qaldy», degen edi. Biz de Sheraǵań baqılyq bolǵanda jetimsirep qaldyq. Aldaǵy ýaqytta onyń murasyn nasıhattaý – paryzymyz», deıdi Halyqaralyq «Alash» syılyǵynyń laýreaty Ámirhan Meńdeke.
Jambyl oblysy,
Jýaly aýdany,
Talapty aýyly
