Kollajdy jasaǵan – Záýresh SMAǴUL, «EQ»
Ánniń sózi men sazy úılesim tapsa, tyńdarmannyń kóńilin toqytatyny, jan tebirentetini belgili. Sol turǵydan alǵanda Ǵazızhan Shekerbek pen aqyn Ershat Qaıboldın arasyndaǵy shyǵarmashylyq tandem sátti shyqqan deýge tolyq negiz bar. Eki avtordyń birlesip jazǵan ánderi sapa turǵysynan alǵanda, ónersúıer qaýymnyń oıyndaǵysyn dál tabatynyna eshkim talasa qoımas. Qara óleńniń qaınar bulaǵynan shólin qandyrǵan Ershat aqynnyń qaı ánge jazǵan sózi bolsyn, tyńdarman júregine dóp tıetini bar. Súıegine sóz qonǵan jas aqyn sonysymen daralanyp turady.
«Sen súrinip ketkende tik turamyn,
Shyr-pyr bolyp shyrqyrap shyqty janym.
Dos tańdamaı bárimen syılasa ber,
Biraq jaýdyń tańdap al myqtyraǵyn», dep keletin tórt jol kez kelgen ákeniń kómeıinde keptelip turǵan sóz ekenine eshkimniń shúbá keltire almasy anyq. Aqıqatynda barlyq áke balasynyń súrinbeýin, jyǵylmaýyn, jolynan adaspaýyn tileıdi emes pe? Áke kóńilindegi sol bir alǵaýsyz tilek án tilinde, qara óleń qalybynda júrekterge dál jetip tur desek, artyq aıtpaspyz. Bul endi Ershat aqynnyń sheberligi ekeni daýsyz. Ony jurt júregine ádemi áýenimen jetkizgen Ǵazızhan Shekerbektiń de eńbegi eren.
«Bóri etekten alǵanda jaý jaǵadan,
Talaılar aryn satyp saýdalaǵan.
Qapyda tabysyńdy joǵaltsań da,
Namysyńdy joǵaltyp alma, balam», dep keletin shýmaq ta kókeıimizde júrgen, alaıda tildiń ushyna kelmegen oıymyzdy aıqyn jetkizip turǵany taǵy ras.
Rasynda júreginde namys oty laýlaǵan árbir áke balasynyń da boıynda qazaq batyrlaryna tán ór rýhtyń oty ushqyndap turǵanyn qalaıtyny aqıqat. Namysyn saýdaǵa salmaıtyn qazaq balasynyń júzi qaı kezde de jarqyn bolatyny da daýsyz. Adaldyq pen ar jolynan aınymaǵan adamnyń júregin jaralaý ońaı kórinse de, kóńiline eshkim qaıaý túsire almaıdy. О́ıtkeni onyń boıynda baıyrǵy babalardan qalǵan tektiliktiń, kisiliktiń sarqyty bar.
«Joldan izdep jolyqtyr azyǵyńdy,
Sen kórsetshi ákeńnen ozyp úlgi.
Jarty álemniń tizginin ustasań da,
Týǵan jerge qaǵarsyń qazyǵyńdy», dep bastalatyn án shýmaqtary da sanany dúr silkindiretini anyq.
Rasynda, adamzat úshin, ásirese áke úshin ulynyń ózi qol jetkize almaǵan zaý bıikti baǵyndyrǵanyn kórgennen asqan baqyt joq shyǵar. Al aqynnyń «jarty álemniń tizginin ustasań da, týǵan jerge qaǵarsyń qazyǵyńdy» deýiniń artynda áke amanaty jatqanyna eshkimniń talasy joq.
«Janym balam, tas laqtyrma taǵdyrǵa,
Jarqyrap júr, kóńilimdi qaldyrma.
Tór seniki, tómendeýge haqyń joq,
El turǵanda artyńda, men turǵanda aldyńda», degen óleń tarmaqtary da tyńdarman sanasyn san saqqa júgirtetini, tolǵandyratyny, oılandyratyny sózsiz. О́ıtkeni bul shýmaqtaǵy kez kelgen tarmaq árbir áke júregindegi tunyq oıdy dálme-dál jetkizip tur. Ánniń mátini sonysymen qundy desek te bolatyn sekildi.
Án mátininen mán ketken qazirgi ýaqytta erinbeginniń bári ánshi bolyp júrgeni jan aýyrtady. Osyndaıda sóz tanı biletin, qasıetti qara óleńge bas ıetin Ǵazızhan Shekerbek sekildi talǵampaz ánshilerdiń bary kóńil toǵaıtady. О́ıtkeni mundaı ánshiler ánniń tabıǵatyn da, qara óleńniń tabıǵatyn da buzbaıdy.
