Analıtıkalyq GeoStatistica resýrsynyń derekterine sáıkes, eń iri qorlar Reseı men Aýstralııada – árqaısysynda shamamen 12 myń tonnadan. Bul elder altyn qory boıynsha álemdik kóshbasshylar sanalady. Olardyń qorlarynyń jıyntyq quny shamamen 1,7 trıllıon AQSh dollaryna baǵalanǵan.
Úshinshi orynda – Ońtústik Afrıka (5000 t), odan keıin Indonezııa (3800 t), Kanada (3200 t), Qytaı (3100 t) jáne AQSh (3000 t) ornalasqan. Al úzdik ondyqty Perý, Brazılııa jáne Qazaqstan túıindeıdi. О́zbekstan 1800 tonna qorymen iri altyn qory bar elder tizimin aıaqtaıdy.
Qazaqstannyń bul reıtıngtegi orny ulttyq taý-ken ónerkásibiniń joǵary áleýetin kórsetedi. Qazirgi tańda elde jańa altyn ken oryndaryn barlaý men ıgerýdiń zor múmkindigi bar. Ásirese, Shyǵys Qazaqstan men Qaraǵandy oblystarynda geologııalyq barlaý jumystarynyń keleshegi aıqyn. Degenmen, qorlardyń bir bóligi qoljetimsiz aımaqtarda ornalasqandyqtan, ınfraqurylym men óndirý tehnologııalaryna ınvestısııa tartý qajet.
Sarapshylardyń pikirinshe, óńdeý qýattaryn damytý jáne ekologııalyq taza óndiris tásilderin engizý Qazaqstanǵa álemdik altyn naryǵynda óz ornyn nyǵaıtýǵa múmkindik beredi. Shıkizatty ishki óńdeýdiń úlesin arttyrý – ulttyq ekonomıkada qosylǵan qunnyń ósýine jol ashady.
Álemdik úrdiske saı, altynǵa degen suranys turaqty ósip keledi. О́ndiris kólemi baıaýlaǵanymen, ortalyq bankterdiń altyn satyp alý qarqyny artqan. Osy jaǵdaıda iri ıgerilmegen qorlarǵa ıe elder, sonyń ishinde Qazaqstan da, uzaq merzimdi perspektıvada aıtarlyqtaı artyqshylyqqa ıe bolmaq.
