PETROPAVL. 24 maýsym. Qalalyq kámeletke tolmaǵandar isi jáne olardyń quqyqtaryn qorǵaý komıssııasynyń otyrysynda bala tárbıesinen jaltarǵan 6 áke-shesheni quqyqtarynan aıyrý jóninde sheshim alyndy. Bul týraly qalalyq IIB-niń qyzmetkerleri habarlady.
Iývenaldy polısııanyń ýchaskelik ınspektorlary 2015 jyldan beri ózderiniń bala tárbıeleý mindetterine salǵyrt qaraǵan 162 áke-shesheni arnaıy esepke alǵan. Bıyl mektepke barýdan bas tartqan, jaman ádetterge úıir 194 oqýshyny anyqtaǵan. 82 ata-anaǵa 14 myń teńgege deıin aıyppul salynǵan.
«Jazǵy kanıkýl ýaqyttarynda jasóspirimder arasynda túrli tártipsizdik qylyqtardy boldyrmaý, aldyn alý jumystaryn kúsheıtý óte mańyzdy. Olardyń quqyqtary da zań normalary sheńberinde qorǵalýy tıis. Saýyqtyrý lagerlerine turmysy az qamtylǵan otbasylardan 500-ge jýyq balalar jiberildi», dedi komıssııa otyrysynda sóz alǵan qalalyq IIB-niń basshysy Qaırat Orazalın.
Bul joly kún tártibine 8 másele usynylsa, olardyń altaýy bala tárbıesimen aınalysýdan qashqaqtaǵan ata-analarǵa qatysty bolyp shyqty. Komıssııa músheleri olardy ata-analyq quqyqtarynan aıyrý týraly usynysty biraýyzdan qoldap, isterdi sotqa jiberýge sheshim aldy.
Jyl basynan beri 10 ata-anaǵa osyndaı shara kórilipti. Olardyń bári ishimdikke áýes.
О́mir Esqalı.
Derek, sýret: Petropavl qalasynyń ishki ister bólimi.
