Jeńisti jol jalǵasady

Jeńis tuǵyryna kóte­ril­gen otandas­ta­ry­myz­dyń arasynan ústel tennısshilerin bóle-jara atap ótýge bolady. Bastapqy básekelerde qarsylastarynyń barlyǵyn bas kótertpeı utqan bizdiń jigitter shırek fınalda Qatardy qapy qaldyrdy. Jartylaı fınalda Túrkııany 8:3 esebimen tize búktirdi. Bas júlde úshin básekede Iran eliniń ókilderi de aıtarlyqtaı qarsylyq kórsete almady. Olardy 8:1 esebimen eń­serdi. Kırıll Gerasımenko, Alan Qurmanǵalıev, Aıdos Kenjeǵulov jekelegen saıys­tarda aıqyn basymdyq tanytsa, juptyq oıynda da jeńis toıyn toılady. Sóıtip, ústel tennısinen jerlesterimiz Islamıadanyń jeńimpazy atandy.

Aýyr atletter jarysyn­da Edige Emberdi (79 kg) julqyp kóterýde úshinshi, serpe kóterýde ekinshi oryndy ıelendi. Qossaıys qorytyndysy boıynsha 343 (152+191) kg kórsetkishpen qola medalǵa qol jetkizdi. Qandasymyz mysyrlyq ÁbdelrahmanElsaıed pen ázerbaıjandyq Ravın Almammadovtan ǵana qalyp qoıdy.

Jarystyń alǵashqy kúnderi qos qolany qorjynǵa salǵan Aıbat Myrzamuratov taǵy da oljaǵa keneldi. Bul joly ol 200 metrge brass ádisimen júzýde úshinshi nátıje kórsetti. Aıbat­tyń aldyn túrkııalyq Dorýk Iogýrtchýoglý men al­jırlik Djaýad Sıoýd orap ketti.

Islam yntymaqtastyǵy oıyndarynyń ashylý saltanatynda elimizdiń kók baıraǵyn ustap shyqqan taǵy bir sportshymyz altyn alyp, Alash jurtyn qýanyshqa bóledi. Ziltemirshi Nurǵısa Ádiletuly jaýapty sátte ózine osyndaı zor senimniń tegin artylmaǵanyn naqty dáleldedi.

94 kg salmaqta synǵa túsken Nurǵısa alǵashqy jat­ty­ǵýda 175 kg ziltemirdi jul­qyp kóterip, altyn aldy. Álem rekord­shysy ári bıylǵy álem chem­pıonatynyń kúmis júldegeri, ırandyq Alıreza Moeınıdiń ózin artqa tastady. Serpe kóterýde de syr bermedi. Saıystyń bul túrinde ol 210 kg-dyq ziltemirdi baǵyn­dyrdy. Qossaıystaǵy nátıjesi – 385 kg. Sóıtip, N.Ádiletulynyń asqan sheberliginiń arqasynda elimizdiń qorjynyna úsh altyn medal tústi. Taǵy bir aýyr atletimiz Aıanat Jumaǵalı (77 kg) serpe kóterý men qos­saıysta qola medaldy enshi­ledi.

Kóp keshikpeı karateshiler qýantty. 84 kg salmaq dáre­je­sinde synǵa túsken Nıkıta Tarnakın jarys jeńimpazy atandy. Sheshýshi synda otandasymyz Iordanııanyń dúldúli Muhammed Adjafarıdi utty. 60 kg sal­maqtaǵy Jolaman Bıǵabyl jartylaı fınalda jeńilis tapqanymen, úshinshi oryn úshin tartysta BAÁ-niń ókili Abdalla Hammadtan basym tústi.

Júzýshilerdiń 4×100 metr­lik keshendi júzý estafetasynda jerlesterimiz kúmis júlde ıelendi. Komandanyń sapynda Ádilbek Mýsın, Maksım Skazobsov, Aıbat Myrzamuratov, Gleb Kovalenıa óner kórsetti.

Sondaı-aq О́zbekstannyń týy astynda óner kórsetken qandasymyz, boksshy Madııar Danııarov 60 kg salmaq dáre­je­sinde dara shyqty.