Stýdenterdiń teorııalyq bilimin tájirıbemen ushtastyrýǵa, ǵylymı zertteý jumystaryn júrgizýge arnalǵan Agrobıostansııa Almaty oblysy Eńbekshiqazaq aýdany Jańashar aýylynda ornalasqan. 38 gektardan astam aýmaqty qamtıtyn keshen stýdentterge oqý-tájirıbelik sabaqtaryn ótkizýge, ǵylymı jobalardy júzege asyrýǵa jáne jańa agrotehnologııalardy synaqtan ótkizýge múmkindik beredi. Zamanaýı oqý-zerthanalyq bazada zerthanalar, 60 adamǵa arnalǵan jataqhana, ashana, jýynatyn bólmeler, sport alańdary men kólik turaǵy qarastyrylǵan.
«Bilim ordamyz taǵy bir jańa nysanmen tolyqty. Agrobıostansııa – teorııa men tájirıbeniń sıntezi. Sondyqtan mundaı nysannyń ashylýy ýnıversıtetimizdegi ǵylymnyń damýyna septigin tıgizedi. Bolashaqta bul jerde tájirıbelik jumystar, ǵylymı zertteýjumystary qyzý júredi dep senemin», dedi Abaı atyndaǵy QazUPÝ Basqarma tóraǵasy-Rektory Bolat Tilep.
Jaratylystaný jáne geografııa fakýltetinde oqıtyn stýdentter agrobıostansııada tájirıbelik sabaqtarmen aınalysyp, magıstranttar men doktoranttar ǵylymı zertteý júrgizedi. Jobalar topyraq pen sý resýrstaryn tıimdi paıdalaný, aýyl sharýashylyǵy daqyldaryn zertteý, bıologııa, ekologııa, geografııa sekildi oqý baǵdarlamalary boıynsha jańa tehnologııalardy synaý baǵyttary boıynsha ótkiziledi.
«Búgin Jaratylystaný jáne geografııa fakýlteti úshin eń qýanyshty kún. Bilim alýshylar úshin teorııa men tájirıbeni úılestirip, bilimin tereńdetip, ǵylymǵa qyzýǵyshylyǵyn arttyratyn baza paıda boldy. Infraqurylymdyq úlken bazada stýdentter men jetekshilerdiń ǵylymmen aınalysýyna qolaıly jaǵdaı jasalǵan. Agrobıostansııanyń jumysyn jandandyryp, ǵylymı-ádistemelik ortalyqqa aınaldyrý bizdiń ujym men stýdentterdiń qolynda dep oılaımyn», dedi Jaratylystaný jáne geografııa fakýltetiniń dekany Kúlásh Kaımýldınova.
