ASTANA. 24 maýsym. Qyzylordada Sanjar Asfendııarov atyndaǵy Qazaq Ulttyq medısına ýnıversıtetiniń fılıaly ashyldy. Bul týraly oblys ákimdiginiń baspasóz qyzmeti habarlady.
Saltanatty sharaǵa oblys ákimi Qyrymbek Kósherbaev pen atalǵan oqý ornynyń rektory Aıqyn Aqanov qatysty.
Fılıal Qyzylorda oblystyq medısına ortalyǵynyń janynan ashylyp otyr. Bul aımaqtan dárigerler daıarlap shyǵaratyn bilim shańyraǵy bolmaq. Eń bastysy elimizdiń medısına ýnıversıtetterinde ınternatýra, rezıdentýra, magıstratýradan ótip jatqan stýdentter endi Qyzylordada bilim ala alady.
Sharada oblys ákimi Qyrymbek Kósherbaev: «Qazir ǵylymmen aınalysý zaman talaby. Iаǵnı, dárigerler barlyǵyn zerdelep otyrýy qajet. Halyqaralyq deńgeıde jumys jasaǵan jaǵdaıda ǵana oblys turǵyndary em izdep ózge aımaqqa barmaıdy. Bul aımaq úshin úlken jańalyq», – dedi.
Atalǵan ýnıversıtettiń 85 jyl tarıhy bar. Onda 200 professor, 800 dosent, 2 myńnan astam muǵalim qyzmet etedi. Endi osy bilikti mamandar Syr eline kelip, qyzylordalyq stýdentterge dáris beretin bolady.
«Bizdiń ýnıversıtetten 70 myńnan astam dárigerler daıarlanyp shyqty. Negizgi maqsat oblystyń potensıalyn kóterý. Oǵan múmkindigimiz jetkilikti. 2017 jyly bul fılıaldy ǵylymı zertteý ortalyǵy retinde qalyptastyramyz», – dep málimdeme jasady rektor Aıqyn Aqanov.
Aıta keteıik, aımaq basshysy oblystyq medısına ortalyǵyn kúrdeli jóndeýden ótkizýge jáne tehnıkalyq bazasyn nyǵaıtýǵa oblystyq bıýdjetten qarjy qarastyrylatynyn jetkizdi.
Talǵat Raıymbek.
Derek, sýret: oblys ákimdiginiń baspasóz qyzmeti.
