Bul týraly Májilis depýtaty Tımýr Qyryqbaev jazdy.
«Qazirgi tańda jeke kepilgerlik kóp jaǵdaıda bankter qoldanatyn aýyr ári ádiletsiz tájirıbege aınalǵan. Nesıe ala almaı otyrǵan azamattyń týystary men tanystary olardyń ornyna tólem jasaý múmkindigi bolmasa da, artyq mindettemelerge qol qoıýǵa májbúr bolatyn jaǵdaılar jıilep ketken. Mundaı praktıka keıin kepilgerlerge úlken aýyrtpalyq túsirip, olardyń ómirin edáýir qıyndatady. Ásirese telefon arqyly qashyqtan rásimdeletin kepilgerlik kezinde azamat ózine alǵan mindettemeniń kólemin tolyq túsinbeı qalýy jıi kezdesedi», degen depýtat.
Osyǵan baılanysty Májilis depýtaty Tımýr Qyryqbaev «Bankter týraly» Zańnyń 54-babyna ózgerister usynǵanyn habarlady. Túzetýge sáıkes, endi bank kepilgerlik nemese kepil rásimdeý kezinde kepilgerdiń qarjylyq jaǵdaıyn eskere otyryp, onyń tólem qabilettiligine mindetti túrde baǵalaý júrgizýge tıis. Sondaı-aq negizgi qaryz ben usynylǵan qamtamasyz etý qunynyń arasyndaǵy aıyrma boıynsha mindettemeni qabyldaýǵa kepilgerdiń jazbasha kelisimi alynýy mindetteledi.
Eger usynylǵan qamtamasyz etý banktiń kepil saıasatyna saı kepil sharty jasalǵan sátte negizgi mindettemeni tolyq kólemde qamtamasyz etse, bank jeke tulǵadan qosymsha kepilgerlik nemese kepil talap etýge quqyly bolmaıdy.
Depýtattyń aıtýynsha, ol usynǵan túzetýdi depýtattar B.Bazarbek pen A.Baqqojaev ta qoldaǵan.
Tımýr Qyryqbaev jumys barysy týraly aldaǵy ýaqytta da aqparat berip otyratynyn atap ótti.
