Bıyl ulandyqtarǵa jalpy sany 1300-ge jýyq bilim granty berilse, sonyń ishinde 15 sertıfıkat osy saltanatty rásimde tabystaldy. Sonymen qatar «Sınergııa» ýnıversıtetiniń ókilderi ofıser-magıstranttarǵa qosymsha 5 grant bóldi.
Sertıfıkattardy Ishki ister mınıstriniń orynbasary – Ulttyq ulannyń Bas qolbasshysy Ańsaǵan Baltabekov tabystady. Ol bul jobanyń jas áskerı qyzmetshilerdiń bolashaǵy úshin úlken múmkindik ekenin atap ótti:
«Bıylǵy shaqyrylymdaǵy 400 ulandyq sarbaz, onyń ishinde elordalyq brıgadanyń 48 ókili elimizdiń joǵary oqý oryndarynda tegin bilim alýǵa múmkindik beretin sertıfıkattarǵa ıe boldy. Bul – jaı ǵana marapat emes. Bul – sizderdiń qyzmettegi úlgili tártibińizge, bilimge degen umtylysyńyzǵa jáne joǵary nátıjelerińizge berilgen baǵa. Memleket jastarǵa, ásker mektebinen abyroımen ótken azamattarǵa senim artady. Senim údesinen shyǵyp, sapaly bilim alyp, el damýyna úles qosyp, keıingi býynǵa úlgi bolatynyńyzǵa senemin», dedi A. Baltabekov.
Aıta ketsek, ásker men elimizdiń joǵary oqý oryndary arasyndaǵy seriktestik 2023 jyldan beri júzege asyp keledi. Kelisimge sáıkes, merzimdi áskerı qyzmetin abyroımen ótkergen azamattar memlekettik bilim grantyna qol jetkize alady. Buǵan qosa, baıqaý jeńimpazdaryna shákirtaqy, jataqhanada tegin turý jáne áskerı kafedraǵa konkýrstan tys qabyldaný quqyǵy beriledi.
Bıyl quqyqtyq tártip áskeri qataryndaǵy tórt myńǵa jýyq merzimdi qyzmet sarbazy baıqaýǵa qatysýǵa ótinim berdi. Olardyń ishinen jaýyngerlik daıyndyq, tártip pen arnaıy tapsyrmalardy oryndaý kórsetkishteri boıynsha úzdik nátıje kórsetkender jeńimpaz atandy. Granttardyń bólinýin qorytyndy reıtıng aıqyndady.
Solardyń biri – 5573 áskerı bólimniń áskerı qyzmetshisi Suńǵat Shámshi: «Qyzmet pen oqý barysyndaǵy jetistikterim maǵan osy múmkindikti berdi. Endi bilimimdi jalǵastyryp, el ıgiligi úshin qyzmet etkim keledi» dep óz qýanyshymen bólisti.
Aıta keteıik, qazirgi ýaqytta elimizdiń 70-ten astam joǵary oqý orny baıqaý jeńimpazdaryn qabyldaýǵa qatysty memorandýmdarǵa qol qoıǵan. Bilim granttaryn tabystaý rásimi quqyqtyq tártip áskeri qatarynda qyzmet etýdiń bedelin arttyryp qana qoımaı, jas sarbazdardyń jeke jáne kásibı damýyna keńinen jol ashatyn mańyzdy yntalandyrý tetigine aınaldy.
