Sýret: ansamblsaltanat.kz
Mereıtoı aıasyndaǵy mańyzdy is-shara ansambldiń tarıhyna arnalǵan kitaptyń tusaýkeserimen bastaldy. Ujymnyń qalyptasý kezeńi, shyǵarmashylyq izdenisteri men jetistikteri jan-jaqty qamtylǵan jańa basylymdy tanystyrý rásimine kompozıtor, Eýrazııalyq mádenıet qorynyń prezıdenti, akademık Erulan Qanapııanov, «Saltanat» memlekettik bı ansambliniń dırektory Elýbaı Kenjalıev, ardagerler Muhametrahym Dáýitov, Qaırat Muqanov, mesenat Sabyrjan Moldahanov, óner maıtalmandary qatysty.
Ulttyq ónerdiń, rýhanı baılyqtyń, sheberlik pen shabyttyń ordasyna aınalǵan ujymnyń merekesi Qazaqstan halqy Assambleıasynyń 30 jyldyǵymen oraılasyp, Almatyteatrynda El «Saltanaty» mereıtoılyq konsertine ulasty. Sahna tórinde «Altynaı» memlekettik halyq bı ansambli, Respýblıkalyq memlekettik akademııalyq koreı mýzykalyq komedııa teatry, Memlekettik Qudys Qojamıarov atyndaǵy uıǵyr mýzykalyq komedııa teatry, «Bahar» bı ansambli, ánshi О́mirqul Aınııazov, «Daryn» memlekettik jastar syılyǵynyń laýreaty, kúıshi Tańat Sádenov, respýblıkalyq konkýrstardyń laýreaty, dástúrli ánshi Jaına Tarǵynova keshtiń kórkin qyzdyrdy.
О́skeleń urpaqty ónerge baýlý, týǵan elge degen súıispenshiligin arttyrý men ultaralyq dostyqty nyǵaıtýdy maqsat etken merekelik keshte «Saltanat» ansambli janynan qurylǵan folklorlyq ansambl áýezdi án men kúmbirlegen kúıden shashý shashsa, myń buralǵan bıshiler ulttyq jáne álem halyqtarynyń bıin salt-dástúrdiń órnegimen astastyryp, kórermenin erekshe áserge bóledi.
«Saltanat» memlekettik bı ansambli bıyl «Bı kerýeni» jobasy aıasynda Túrkistan, Aqtóbe, Soltústik Qazaqstan oblysynda jáne Shymkent, Taraz qalalarynda gala-konsert, sheberlik sabaqtary men fotokórme ótkizdi. Kásibı mamandardyń sheberlik sabaqtaryna 1000-nan asa horeograf, bıshiler qatysyp, arnaıy sertıfıkat tabystaldy.
ALMATY
