Sýret JI kómegimen jasaldy
«Egemen Qazaqstan»-da jarııalanǵan Memlekettik keńesshi Erlan Qarınniń maqalasy osy ózekti máseleni jan-jaqty taldap, medıa etıkanyń mańyzyn aıqyn kórsetedi. Buǵan álem memleketteri múddeli ekenin jetkizedi. Bul úrdisten Qazaqstan da syrt qalmaı, Ortalyq kommýnıkasııalar qyzmetiniń quramynan Jalǵan aqparatqa qarsy kúres ortalyǵyn qurdy. Bul ortalyqtyń mindeti – feıkterdi der kezinde anyqtap, zııanyn joıý, manıpýlıasııaǵa tosqaýyl qoıý jáne aqparattyq keńistikti taza ustaý.
Osy oraıda grek oıshyly Sokrattyń sózi eske túsedi. Ol «Zerttelmegen ómir – ómir súrýge tatymaıdy» degen.
Qarın atap ótkendeı, aqparattyq shý kóbine qoldan jasalady. Belgili bir toptar óz múddesi úshin ádeıi emosııalyq fon qalyptastyryp, qoǵam talqylaýyn burmalap jiberedi. Sonyń saldarynan shyn máninde kerek, mańyzdy ári rastalǵan aqparat orynsyz kontenttiń tasasynda qalyp qoıady.
Medıa salasynyń teoretık ǵalymdary Bıll Kovak bylaı dep tujyrymdaıdy:
«Jýrnalıstıkanyń negizgi mindeti – azamattarǵa kerek aqparatty jetkizý».
Qaıtalap aıtamyz, tek qana kerek aqparat taratý lázim. Keıde málimetti dál sol kúıi esep retinde berý – ushpaqqa shyǵarmaıdy. Aqparat taratýdy jaýapkershiligine alǵan adamnyń mindeti – onyń saldaryn túsiný.
Aıtalyq, buqara halyq saılaýǵa túsip jatqan azamattar óz qyzmetin asyra paıdalanǵany úshin olarǵa qylmystyq aıyp taǵylǵanyn bilý tıis. Jańalyqtyń bul túri adamǵa durys tańdaý jasaýǵa kómektesedi. Iаǵnı etıkaǵa saı. Al eger sheneýniktiń balasy kámeletke jetpeı ishimdik ishkeni úshin mektep tarapynan jazalansa, ony bilý - aýdıtorııa úshin mańyzdy emes. Sebebi mundaı aqparatty taratý bala úshin zııan. Zańnama maqalany jarııalaýǵa kedergi bolmasa da, etıkalyq turǵyda bul durys emes.
«Sondyqtan jalǵan aqparatty anyqtap, kúshin joıýmen ǵana shektelmeı, jańa sıfrlyq etıkany qalyptastyrý kerek. Bul degenimiz – aqparat taratý jáne kontentti qabyldaý mádenıetin ornyqtyrý», deıdi Erlan Qarın.
Demek, aqparat taratýdyń mádenıeti men ony qabyldaý jaýapkershiligin arttyrý – ýaqyt talaby.
