Bul is-shara «Jańa asý» baıqaýy aıasynda júzege asyp jatqan «Tanymal sheteldik mýzykalyq shyǵarmalar mádenıetiniń qazaq tilinde jańǵyrýy: án men til toǵysy» jobasymen júzege asty.
Álemge tanymal 100 ánniń qazaq tilindegi jańa nusqalary alǵash ret usynyldy. Aıta keteıik, joba jetekshisi – L.N.Gýmılev atyndaǵy Eýrazııa ulttyq ýnıversıteti fılologııa fakýltetiniń dekany, «Topjarǵan» aqyndar klýbynyń jetekshisi, fılologııa ǵylymdarynyń kandıdaty Serikzat Dúısenǵazy.
Kesh barysynda «My Heart Will Go On», «Bailando», Maıkl Djeksonnyń You’re Not Alone, V.Meladzeniń «Krasıvo», Iý.Antonovtyń «Mechty sbyvaıýtsıa», «Krysha doma tvoego», «Sherı-Sherı ledı», «Hýtarıanka», DABRO tobynyń «Iýnost», One Direction tobynyń «Night Changes», sondaı-aq taǵy sol sekildi keńinen tanymal hıtterdiń qazaq tilindegi jańa nusqalary oryndaldy. Án mátinderin «Topjarǵan» aqyndar klýbynyń músheleri aýdarǵan. Jobanyń ıdeıa avtory – EUÝ rektory Erlan Sydyqov.
«Bul joba – aýdarma óneri men zamanaýı mýzykany úılestire otyryp, álemdik hıtterdiń qazaq tilindegi sapaly nusqalaryn jasaýǵa baǵyttalǵan shyǵarmashylyq eńbek. Jobaǵa qatysýshylar shetel ánderiniń mátinderin beıimdep, olardyń kórkemdik, yrǵaqtyq jáne maǵynalyq erekshelikterin qazaq tilinde jetkizýge kúsh saldy», dep atap ótti joba jetekshisi Serikzat Dúısenǵazy.
Kesh sońynda EUÝ ombýdsmeni, medısına ǵylymdarynyń doktory, professor Nelıa Shápekova kórermender atynan sóz alyp, «Topjarǵan» aqyndar klýbyna toǵyzqumalaq taqtasyn tartý etti.
«Ulttyq ónerimizben qosa, ulttyq oıyndarymyz da damı bersin. Búgin sonaý 80-jyldardaǵy stýdenttik kúnimiz eske tústi, bul keshtiń de rýhy sol – birge bolý, bir-birimizdi qoldaý, mýzyka arqyly birigý. Búgin sondaı keremet, qazaqsha karaoke kesh boldy», dedi ǵalym.
Elordalyq ónersúıer qaýymǵa erekshe áser qaldyrǵan bul kesh qazaq tiliniń múmkindigin, aýdarma óneriniń qýatyn jáne mýzyka men tildiń tabıǵı úılesimin taǵy bir márte dáleldedi.
