foto: polisia.kz
Almaty qalasynda jańa týǵan nárestelerdi satýmen aınalysqan qylmystyq toptyń áreketi toqtatyldy. Qylmystyq toptyń uıymdastyrýshylary qıyn jaǵdaıǵa tap bolǵan jas qyzdardy paıdalanǵan jáne syıaqy berý arqyly sábılerdi úshinshi tulǵalarǵa berýge ıtermelegen. Barlyq kúdiktiler ustaldy. 20-dan astam qylmystyq is boıynsha tergeý júrip jatyr. Kúdiktilerge múlikti tárkileýmen 18 jylǵa deıin bas bostandyǵynan aıyrý jazasy qarastyrylǵan.
Abaı oblysynda azamattardy májbúrli túrde eńbekke tartý arqyly qanaýmen baılanysty qylmystyq áreket áshkerelendi. 11 qylmystyq is qozǵaldy, materıaldar sotqa joldandy.
Shymkent, Aqtóbe, Jambyl, Batys Qazaqstan, Qaraǵandy jáne Qostanaı oblystarynda túngi oıyn-saýyq oryndaryna júrgizilgen turaqty tekserýler barysynda, onyń ishinde kámeletke tolmaǵandardy túrli qanaý túrlerine tartý faktileri anyqtaldy.
Astana qalasynda polıseıler prokýratýramen birlesip Gete kóshesindegi temirjol vokzaly mańynda reıdter ótkizdi. Nátıjesinde azamattardy seksýaldyq qanaýǵa arnalǵan prıtondar uıymdastyrý jáne ony ustaý boıynsha segiz adam qylmystyq jaýapkershilikke tartyldy.
Aqmola oblysynda otbasylyq qundylyqtardan bas tartýdy jáne retsiz jynystyq qatynasty nasıhattaıtyn «rýhanı ortalyq» ashqan dinı toptyń áreketi toqtatyldy. Tintý barysynda dinı ádebıetter, atrıbýttar jáne rásimdik zattar tárkilendi. Tıisti saraptamalar taǵaıyndalyp, tergeý júrgizilip jatyr.
Buǵan deıin Astana, Almaty jáne Shymkent qalalarynda «elıtalyq eskort» uıymdastyrýshylarynyń áreketi áshkerelengen. Olar túngi klýbtar men barlarda jas qyzdardy jumysqa tartýmen aınalysyp, jezókshelikke deldaldyq jasaǵany anyqtaldy. Qylmystyq ister sotqa joldandy.
Sonymen qatar, Almaty men Astanada túngi mekemelerde profılaktıkalyq reıdter ótti. Reıdterdiń maqsaty – jastardy qylmystyq qanaýdan qorǵaý, olardyń asosıaldy ortaǵa tartylýyna jol bermeý jáne qoǵamdaǵy adamgershilik qundylyqtardy nyǵaıtý.
Jalpy keshendi profılaktıkalyq jumys jalǵasady.
