Foto: Ashyq derekkóz
Oqıǵa 18 jeltoqsanǵa qaraǵan túni KC931 reısinde bolǵan. Kýágerlerdiń sózine qaraǵanda, áýede oń jaq qozǵaltqysh tusynan belgisiz tars etken dybys estilip, ushaq shuǵyl tómendeı bastaǵan. Sonymen qatar, jolaýshylar salonda kúıik ıisi sezilgenin habarlady. Ekıpaj músheleri qalyptasqan jaǵdaıǵa baılanysty laınerdi jaqyn mańdaǵy Delı áýejaıyna qondyrý týraly sheshim qabyldaǵan.
Air Astana áýe kompanııasynyń baspasóz qyzmeti bul aqparatty rastap, qonýdyń «tehnıkalyq sebepterge» baılanysty bolǵanyn málimdedi. Resmı málimetke súıensek, bortynda 138 jolaýshysy bar ushaq Almatydan saǵat 01:00-de ushyp shyǵyp, Delıge jergilikti ýaqytpen 05:51-de aman-esen qonǵan.
«Qazirgi ýaqytta barlyq jolaýshylarǵa tamaq berilip, ýaqytsha vızalar rásimdeldi. Áýe kompanııasy olardy qonaqúıge ornalastyrý máselesin sheship jatyr. Sonymen qatar Bangkokqa sapardy jalǵastyrý úshin rezervtik bort daıyndalýda», dep habarlady kompanııa ókilderi.
Aıta keteıik, bul Air Astana ushaqtarymen sońǵy eki kúnde bolǵan ekinshi tótenshe oqıǵa. Keshe, 17 jeltoqsan kúni Almatydan Astanaǵa baǵyt alǵan Airbus A321neo laıneri de salondaǵy tútinge baılanysty MAYDAY (belgisiz qaýip) sıgnalyn berip, áýejaıǵa keri qaıtqan bolatyn.
