Foto: Ashyq derekkóz
Kásibı kemeldik pen naryq zańy
Fýtboldaǵy statıstıka – jaı ǵana qurǵaq sandar emes, ol oıynshynyń kásibı bolmysyn aıqyndaıtyn basty ındıkator. Dese de, statıstıkalyq reıtıngtiń joǵary bolýy birden Eýropanyń top-klýbtaryna dańǵyl jol ashady deý asyǵystyq. Bul rette fýtbol sarapshysy Álimjan Asqardyń paıymy naqtylyq pen kásibı saqtyqqa negizdelgen:
«Temirlan Anarbekovtyń Eýropanyń klýbtarynda óner kórsetetinine kámil senemin. Tipti Top-5 chempıonattarda da oınaý alýǵa qaýqary jetedi degen oıym bar. Biraq dál qazir Anarbekovke «Inter» sııaqty nemese basqa da chempıondar lıgasynyń alpaýyttary nazar aýdaryp jatyr dep oılamaımyn. Bir maýsymdy Temirlan Anarbekov óte sátti ótkizip jatyr, biraq qazirdiń ózinde ony Eýropanyń top-klýbtary julyp áketýge daıyn dep aıtýǵa erte dep oılaımyn. Biraq bolashaqta buıyrsa Temirlan Anarbekov sol aǵylshyn premer lıgasynda oınap, óziniń armanyna qol jetkizedi degen senimdemin. Osyndaı deńgeıde «Qaıratta» 2-3 jyl óner kórsetse, odan keıin basqa komandaǵa aýysýǵa bolady dep aıta alamyz. Ázirge Anarbekov «Qaıratta» qalady dep oılaımyn», dedi ol.
Shyndyǵynda, Chempıondar lıgasynyń keler maýsymy jas qaqpashy úshin sheberlikti shyńdaıtyn basty polıgon bolmaq. Álimjan Asqardyń pikirinshe, «Qaırattyń» chempıondyq ataǵyn qorǵap qalýy – Temirlanǵa degen úlken jaýapkershilik.
«Iá, «Qaırat» keler maýsymda da ÝEFA chempıondar lıgasynda óner kórsetedi. Bıyl olar chempıon ataǵyn qorǵap qala aldy. Sondyqtan «Qaırat» fýtbol klýby Temirlan Anarbekovke zor senim artady degen oıdamyn. Jaqyn ýaqytta onyń Eýropaǵa kóshýin kórip turǵan joqpyn», deıdi Álimjan Asqar.
Transferlik strategııa: «Tramplın» be, álde táýekel me?
Transfer naryǵynyń ózindik jazylmaǵan zańdary bar. Munda tek oıynshynyń talanty ǵana emes, klýbtyń ekonomıkalyq múddesi men strategııalyq jospary qatar júredi. Tanymal sport kommentatory Ermuhamed Máýlen Anarbekovtyń Italııa chempıonatyna aýysýy yqtımal ekenin aıtady.
«Temirlan «Interge» qarsy matchta jaqsy turdy. Negizi Italııa chempıonatyna aýysýy ábden yqtımal. Italııada komandalar qorǵanys arqyly oınaıdy. Kez kelgen klýbqa oınaýǵa daıyn ekenin naqty bir maýsymda ótken 4-5 matchqa qarap olaı aıta almaımyz. Árıne aǵylshyn premer lıgasy dep otyr ózi. Biraq Eýropanyń top chempıonattarynyń ortańqol komandalaryna aýysýy múmkin. Álbette «Qaırat» komandasy kelesi jyly chempıondar lıgasynda oınaıdy. Aleksandr Zarýskıı ózge komandaǵa aýysty, «Qaırattyń» negizgi qaqpashysy qazir Temirlan bolady, Sherhan Qalmurza ekinshi qaqpashy jáne úshinshi qaqpashy «Qaırat» jastar komandasynan alynady. Eýropaǵa ketýin shegerýi de múmkin. Endi «Qaırat» degen kásipqoı jeke kásipkerdiń komandasy, sondyqtan jaqsy bir 2-3 mln eýro usynatyn bolsa bir komandalarǵa negizi satýǵa da bolady. «Qaırat» komandasy sata salýy múmkin jáne ornyna basqa qaqpashy ala salady ǵoı. Qazaqstanda qazir myqty turyp júrgen qaqpashylar kóp qoı», deıdi ol.
Ermuhamed Máýlenniń paıymynsha, birden alpaýyt klýbtyń qosalqy quramynda qalyp qoımaı, Portýgalııa nemese Nıderlandy sekildi «beıimdelý lıgalary» arqyly ósý – Temirlan úshin eń utymdy jol.
«Top-5 chempıonattan da bólek myqty komandalar bar. Únemi chempıondar lıgasynda oınaıtyn, únemi Eýrokýbokta oınaıtyn mysalǵa «Slavııa praga», «Vıktorııa plzen», «Aıaks», «Feıenoord», PSV nemese Fransııanyń keıbir komandalary. Eýropadaǵy myqty qaqpashylardyń kóbisi Portýgalııa chempıonatyna shyǵady. Ony da umytpaǵan jón. Mysaly «Sportıng», «Benfıka», «Portý», «Braga», «Eshtrela Amadora» degen sııaqty komandalar bar. Sol lıgalardyń birine aýysyp birtindep kóterýge bolady. Eýropalyq mentalıtetti, fýtboldy ishki jaǵdaıyna kirý úshin birinshi osyndaı lıgalardan baryp ósken durys. Birden «Lıverpýlge» aýysyp nemese «Interge» aýysyp ketip Iаn Zommerdiń máńgi baqı qosalqy quramynda otyrǵannan paıda joq», dedi Ermuhamed Máýlen.
Temirlan Anarbekov seńdi buza ala ma?
Sarapshylardyń pikirinshe, Temirlan Anarbekovtyń Eýropaǵa attanýy – tek jeke mansaptyń tabysy emes, bul – búkil otandyq fýtbol mektebiniń abyroıy men bolashaǵyna salynǵan ınvestısııa. Bul rette Álimjan Asqar qazaq balasynyń eń bıik shyńnan kórinýin ulttyq maqtanyshqa balaıdy.
«Temirlan Anarbekov birden sol top-5 chempıonat lıgasyna aýysyp, daıyn barsa degen tilegim bar. Oǵan aǵylshyn premer lıgasynda oınaý jarasady degen senimdemin. Eger «Chelsıge» aýysyp jatsa, shabýyl shebinde Dastan Sátpaev, qaqpany Temirlan Anarbekov qorǵap jatsa – budan asqan biz úshin baqyt bolar ma, shirkin! Kez kelgen fýtbolshynyń jeke jetistigi túbi sol Qazaqstandaǵy fýtboldyń damýyna jeteleıdi. Sondyqtan búgin Anarbekov Eýropaǵa ketse, erteń basqa fýtbolshylar izin jalǵasa, sóıtip ulttyq quramamyzdyń 5-6 oıynshysy Eýropanyń beldi klýbtarynda óner kórsetkende – túbi sol Eýropa Chempıonatyna alyp shyǵady. Nátıjesinde Qazaq fýtboly orasan zor damyp kete alady. Temirlannyń ishki minezi jáne sheberligi kez kelgen básekege tótep berýge daıyn dep oılaımyn», dedi Álimjan Asqar.
Bul oıdy Ermuhamed Máýlen de jalǵaı otyryp, Anarbekovtyń kásibı daıarlyǵy otandyq akademııalardyń sapasyn kórsetetinin alǵa tartady.
«Qazir qaqpashylardyń shetelge shyǵýy endi-endi bastalyp jatyr. Iá, Anarbekov top komandalaǵa aýysyp bul seńdi buzady dep oılaımyn. Áıtpese Temirlan Anarbekovten kem emes Qazaqstanda qaqpashylar bolǵan rasyn aıtqanda. Temirlannyń minezi de bar, ishki daıyndyǵy da jaman emes. «Qaırat» degen bul eýropalyq «Leıpsıg» akademııasynyń stılinde daıyndalǵan balalar ǵoı. Daıyndyǵy kelip tur, eshqandaı qınalmastan Portýgalııa chempıonatyna aýyssa, negizgi quram qaqpashysyna aınalyp ketýi múmkin», dedi Ermuhamed Máýlen.
Sarapshylardyń paıymyna súıensek, jas talanttyń aldyndaǵy tańdaý tek sporttyq emes, ulttyq brendti qalyptastyrýdyń jaýapty kezeńi. Eýropanyń jasyl alańynda qazaq qaqpashysynyń senimdi oıynyn kórý — tek ýaqyttyń enshisindegi dúnıe. Al sol ýaqyttyń aýqymy Anarbekovtyń búgingi batyl qadamyna tikeleı baılanysty bolyp qalmaq.
«Qaırat» qaqpashysy Temirlan Anarbekov UEFA reıtınginde kósh bastady
