Bul týraly qoǵamdyq tyńdaýlar barysynda «Almatybasjospar» ǵylymı-zertteý ınstıtýtynyń basshysy Ashat Sadýov málimdedi.
Onyń aıtýynsha, qoldanystaǵy «qyzyl» metro jelisin uzartý josparlanyp otyr. Atap aıtqanda, «Qalqaman» stansııasyn ashyp, odan ári «Barlyq» bazaryna deıin taǵy úsh stansııa salý kózdelgen.
Sondaı-aq «jasyl» metro jelisin bolashaqta Alataý qalasymen baılanystyrý múmkindigi qarastyrylyp jatyr. Bul qala mańynda turatyn turǵyndarǵa qoǵamdyq kólikke yńǵaıly aýysýǵa jol ashady.
Budan bólek, jolaýshylar aǵynyn teńestirý jáne qalanyń polısentrlik damýyn qamtamasyz etý maqsatynda jelini «Qazaqfılm» aýdanyna deıin uzartý nusqasy da talqylanýda. Josparda áýejaı aýmaǵynda metro stansııasyn salý múmkindigi de bar.
Almatyda LRT jobasyn iske qosý máselesi de bas jospar aıasynda qarastyrylǵan. Ashat Sadýovtyń málimetinshe, «Barlyq» stansııasynan bastap buryn Tóle bı kóshesimen ótken tramvaı dálizin qaıta jandandyrý josparlanyp otyr. LRT jelisi Baýyrjan Momyshuly kóshesi arqyly depoǵa deıin jetip, «qyzǵylt sary» baǵyt «Qazaqfılmge» deıin sozylady. Sonymen qatar Jarokov kóshesi arqyly Tóle bı jáne Abaı dańǵyldarymen baılanys ornatý kózdelgen.
Instıtýt basshysy jaqyn ýaqytta LRT-nyń alǵashqy jelisi boıynsha tehnıkalyq-ekonomıkalyq negizdeme (TEN) ázirleý josparlanyp otyrǵanyn aıtty.
Josparlanǵan jobalar Almatydaǵy kólik júktemesin azaıtyp, qala men qala mańyndaǵy aýdandar arasyndaǵy qatynasty jaqsartýǵa baǵyttalǵan.
