Oblys ákimi Berik Ýálı kezdesý aldynda oqýshylardyń jobalary men jetistikteri usynylǵan kórmeni tamashalady. Kórmede «robotehnıka» baǵytynda kolledjder men mektepterdiń úzdik ǵylymı jobalary, sondaı-aq H halyqaralyq áskerı-patrıottyq «Aıbyn» jastar jıynynyń júldegerleri, daryndy balalarǵa arnalǵan Sh.Ýálıhanov atyndaǵy «Jas Ulan» arnaıy erler mektep-lıseıi oqýshylarynyń jetistikteri usynyldy.
Erkin formatta ótken kezdesýde Abaı oblysynyń daryndy oqýshylary jetistikteri men aldaǵy maqsattary týraly aıtyp, oılary men usynystaryn ortaǵa saldy. Aımaq basshysy sóz sóılegen árbir qatysýshyny muqııat tyńdap, usynystarǵa jaýap berdi.
«Búgin men senderge aldyńǵy býynnyń shyn peıilin aıtqym keledi: sender – bizdiń óńirdiń eń úlken úmiti, eń úlken senimisińder. Biz sendermen maqtanamyz. Bul zalda talantymen de, eńbegimen de bıikke kóterilgen jas kóshbasshylar otyr. Memleket basshysy Qasym-Jomart Toqaev: «Elimizde júzege asyrylyp jatqan árbir bastama, eń aldymen, sizderge arnalady. Qazirgi reformalardyń ıgiligin kóretin de, eldik isterdi jalǵastyratyn da – sizder» degen edi. Sender olımpıadalarda, jobalarda, jarystarda jeńiske jetip qana qoımaı, jańa ıdeıalarǵa jol ashyp, úlken jaýapkershilikti arqalap júrsińder. Biz búgin resmı jıynǵa emes, shynaıy áńgimelesý úshin jınaldyq. Oılaryń, suraqtaryń, usynystaryń – biz úshin mańyzdy. О́ıtkeni talantty jastarǵa óz áleýetin týǵan jerinde júzege asyrýǵa jaǵdaı jasaý – barlyǵymyzdyń ortaq mindetimiz. Osy oraıda bıylǵy oqý jylynyń sońynda halyqaralyq olımpıadanyń júldegerlerine, ıaǵnı 18 oqýshyǵa oblys ákiminiń atynan qomaqty somadaǵy stıpendııa taǵaıyndalatynyn da qýanyshpen habarlaǵym keledi. Bul bilimge qushtar, talapty jastarǵa úlken motıvasııa bolary sózsiz», dedi aımaq basshysy.
Jıynǵa qatysqan oqýshylarǵa oblys ákiminiń atynan aqshalaı sertıfıkattar tabystaldy. Máselen, 2025 jyly Abaı oblysynyń oqýshylary halyqaralyq jáne respýblıkalyq olımpıadalar men baıqaýlarda 277 medal jeńip alǵan edi. Olardyń qatarynda Halyqaralyq matematıka jáne ınformatıka pánderinen Ál-Harezmı olımpıadasy, jasóspirimder arasyndaǵy halyqaralyq jaratylystaný-ǵylymı olımpıadasy (IJSO), matematıka, ınformatıka, fızıka jáne hımııa pánderi boıynsha «Týımaada» halyqaralyq olımpıadasy, О́.Joldasbekov atyndaǵy matematıka jáne mehanıka boıynsha zertteý jobalarynyń halyqaralyq konkýrsy, sondaı-aq halyqaralyq áskerı-patrıottyq «Aıbyn» jastar jıyny bar.
