Sýret: gov.kz
Basqosýdy Jazýshylar odaǵy basqarmasynyń tóraǵasy Mereke Qulkenov ashyp, júrgizdi. Is-shara barysynda odaqtyń bir jyl ishinde atqarǵan jumystary týraly beınerolık kórsetildi. Sondaı-aq Parlament Senatynyń depýtaty Rýslan Rústemov Senat tóraǵasy Máýlen Áshimbaevtyń, Mádenıet jáne aqparat mınıstriniń orynbasary Aıbek Sydyqov, Premer-mınıstrdiń orynbasary – Mádenıet jáne aqparat mınıstri Aıda Balaevanyń quttyqtaý hatyn oqyp berdi. Al Qyrǵyz Respýblıkasynyń Memlekettik hatshysy, Qyrǵyzstannyń El jazýshysy Arslan Koıshıev, Qazaqstannyń halyq jazýshysy Tólen Ábdik, jazýshy, Memlekettik syılyqtyń laýreaty Roza Muqanova, jazýshy, fılolog-ǵalym Nurdáýlet Aqysh, «Jańa Qazaqstannyń ádebı-tanymdyq panoramasy» jobasynyń qatysýshylary – jazýshy Jaqsylyq Muratbek pen aqyn Azamat Ábilqaıyr sóz sóılep, óz oı-pikirlerin aıtty.
Sonymen qatar Ázerbaıjannyń halyq jazýshysy, Ázerbaıjan Jazýshylar odaǵynyń tóraǵasy Anar Rzaevtyń, О́zbekstan prezıdentiniń keńesshisi, jazýshy Haırıddın Sultannyń, TÚRKSOI halyqaralyq uıymynyń Bas hatshysy Sultan Raevtyń quttyqtaýlary beınebaılanys arqyly tyńdaldy.
Jıyn aıasynda «Túrki áleminiń ádebıeti» jobasy aıasynda shyqqan 4 jańa kitaptyń, sondaı-aq «Jańa Qazaqstannyń ádebı-tanymdyq panoramasy» jobasynyń aıasynda jaryq kórgen jas qalamgerlerdiń 20 kitabynyń tusaýy kesildi. Budan bólek, «Qoǵamdyq mańyzy bar ádebıetterdi basyp shyǵarý jáne taratý» memlekettik baǵdarlamasy sheńberinde basylǵan Qadyr Myrza Áli men Tumanbaı Moldaǵalıevtiń kitaptary tanystyryldy.
Jazýshy Tólen Ábdik elordada alǵash ret uıymdastyrylǵan mundaı jyldyq qorytyndy jıynnyń mańyzyn atap ótip, Jazýshylar odaǵynyń birjyldyq jumysyna joǵary baǵa berdi. Al qyrǵyz jazýshysy Arslan Koıshıev is-sharany uıymdastyrǵan Qazaqstan Jazýshylar odaǵyna alǵys aıtyp, qazaqstandyq qalamgerlerdi keler jyly ótetin Ystyqkól halyqaralyq forýmyna qatysýǵa shaqyrdy.
О́z kezeginde Jazýshylar odaǵynyń tóraǵasy Mereke Qulkenov bıyl atqarylǵan jumystardy qorytyndylaı kele, klassık jazýshy Tólen Ábdik pen qalamger Qanat Ábilqaıyrdyń kitaptaryn halyqaralyq Býker syılyǵyna usyný baǵytynda tıisti jumystar júrgiziletinin atap ótti. Sondaı-aq odaq basshysy bıyl 75 jasqa tolǵan astanalyq belgili qalamger, jýrnalıst Nesip Júnisbaevty mereıtoıymen quttyqtap, ıyǵyna shapan japty.
Azamat QUSAIYN
