Saakashvılı taǵy da syn sadaǵyna ilindi

ASTANA. 23 naýryz. Grýzııadaǵy bıleýshi koalısııa – «Grýzın armanynyń» negizin qalaýshy, eldiń burynǵy premer-mınıstri Bıdzına Ivanıshvılı Mıhaıl Saakashvılı týraly pikirin bildirdi. Ol eks-prezıdenttiń partııasy «Biryńǵaı ulttyq qozǵalystyń» bılikke qaıtadan kelýi úshin jasaǵan isterin bos áýreshilik dep sanaıdy. Bul týraly RIA Novostı habarlady. Ivanıshvılı óziniń «2030» keshkilik telejobasynda: «Olar qaıtadan bılikke kelip, buryn ózderiniń qolynda bolǵan dúnıeniń bárin qaıtarýdy qalaı ma? Eger solaı oılaısa grýzın halqyn sonshalyqty aqymaq sanaǵany. Álde ózderi bılikte bolǵan kezde el túrmelerinde bolǵan jaǵdaıdy umytyp qaldy ma? Sondyqtan olardyń bılikke qaıta kelýi úshin jasaǵan áreketteri bos áýreshilik. Sebebi, olardyń kezindegi ahýal osynshalyqty tez umytylyp ketpeıdi. Eger ózderi solaı oılasa, qatelesedi», – dedi. Bıdzına Ivanıshvılı 2012-2013 jyldary Grýzııanyń premer-mınıstri boldy. «Sur kardınal» degen atpen de tanymal memleket qaıratkeri. Ol premer-mınıstr qyzmetin ózi synap otyrǵan eks-prezıdenttiń tusynda ótkizdi. Mamandardyń aıtýynsha, «Grýzııa armany» partııasynyń saılaýda jeńiske jetýi Saakashvılıge aýyr soqqy boldy. Eldiń qazirgi basshysy Georgıı Margvelashvılıdiń prezıdent saılaýyna «Grýzın armany» koalısııasynyń atynan qatysqanyn aıta keteıik. Elaman Qońyr. Derek, sýret: RIA Novostı.