Foto: ashyq derekkóz
Investbanq Qazaqstandaǵy mys salasyndaǵy mámilede qarjylyq jáne ınvestısııalyq keńesshi retinde qyzmet atqardy. Kelisimge qazaqstandyq Verum Mining kompanııasy men qytaılyq Lygend Resources & Technology Co., Ltd. korporasııasy qatysty. Mámile aıasynda strategııalyq ınvestor tartylyp, birlesken kásiporyn quryldy jáne qazaqstandyq taraptyń úlesin saqtaı otyryp, ınvestısııalyq qurylym qalyptastyryldy. Mámileniń alǵashqy kezeńi 125 mln AQSh dollaryna baǵalandy.
Qazaqstanǵa iri ınvestısııa tartý jaıynda sóz qozǵalǵanda, ádette, halyqaralyq korporasııalar men shıkizat alpaýyttary eske túsedi. Alaıda mundaı mámilelerdiń artynda jergilikti bastamany jahandyq kapıtalmen ushtastyra alatyn adamdar men kompanııalar turady.
Aıǵazy Qusaıynovtyń qytaılyq Lygend Resources & Technology Co., Ltd. korporasııasymen seriktestigi qazaqstandyq bıznestiń sheteldik ınvestısııalardy tarta otyryp, baqylaý men strategııalyq bastamany saqtaı alatynynyń aıqyn mysaly.
Eki jyl buryn Aıǵazy Qusaıynov mámileniń ashyq qurylymyn qalyptastyryp, damý strategııasyn aıqyndaýǵa kómektesetin senimdi ınvestısııalyq keńesshi izdedi. Bul mindetti Investbanq komandasy óz moınyna aldy.
«Qazaqstanǵa tek tehnologııalar emes, kapıtal men senim qalyptastyratyn júıeler qajet ekenin árdaıym túsindik. Ol úshin ınvestorlarmen bir tilde sóılep, onjyldyqtarǵa arnalǵan keleshekti kórsete bilý asa mańyzdy. Investbanq tek álemdik deńgeıdegi joǵary kásibı kompanııa ǵana emes, osy fılosofııany tolyq bólisetin seriktes», dedi Aıǵazy Qusaıynov.
Azııa aımaǵyndaǵy keńinen tanylǵan tájirıbesiniń arqasynda Investbanq qytaılyq mıllıarder ári nıkel salasynyń iri oıynshysy Saı Szıanıýn basqaratyn Lygend Resources kompanııasymen baılanys ornatty. Nıkel men mysty óndirý jáne óńdeýge mamandanǵan kompanııa úshin Qazaqstan Ortalyq Azııa naryǵyna shyǵýdyń tıimdi núktesine aınaldy.
Kelissózder nátıjesinde Lygend Resources Verum Mining kompanııasynyń bir bólimshesine ınvestısııa quıdy, sondaı-aq Silk Road birlesken kásiporny quryldy. Bul osy saladaǵy sońǵy jyldar aıasyndaǵy eń iri ári mańyzdy mámilelerdiń birine jatady.
Mámileniń alǵashqy kezeńi 125 mln dollarǵa baǵalandy. Qytaılyq tarap baqylaýshy úleske ıe bolsa, qazaqstandyq tarap sıngapýrlyq Verum Group holdıngi arqyly 48,5 paıyz úlesin saqtap qaldy.
«Bastapqyda Investbanq qarjylyq keńesshi retinde qatysqanymen, keıin mámileniń tolyqqandy arhıtektory deńgeıine kóterildi. Komanda ınvestısııalyq model ázirlep, qarjylandyrý ssenarıılerin eseptedi jáne Qazaqstan men Qytaıdaǵy bıznes júrgizý tásilderiniń mádenı erekshelikterin eskere otyryp, seriktestikti qurylymdaýǵa, quqyqtyq ashyqtyqty qamtamasyz etýge jáne taraptar arasyndaǵy senimdi nyǵaıtýǵa atsalysty. «Bul Ońtústik-Shyǵys Azııa men Ortalyq Azııada bıznes júrgizýdegi kópjyldyq tájirıbeniń arqasynda múmkin boldy. Mundaı mámilelerde ártarapty ári aýqymdy tájirıbe de erekshe ról atqarady», dedi Investbanq kompanııasynyń SOO-sy Talǵat Qantaev.
«Qytaılyq ınvestorlar úshin basty qundylyq – senim men strategııalyq bolashaq. Sondyqtan bul mámilede negizin qalaýshy men komandanyń senimdiligine jáne aktıvtiń ósý áleýetine basa mán berdik. Búginde Investbanq – tek sıfrlyq sheshimder usynatyn platforma ǵana emes, bıznes pen ınvestorlardyń múddeleri toǵysatyn orta. Mundaı mámileler Investbanq aldaǵy ýaqytta qalyptastyra alatyn biregeı ekojúıelik múmkindikterdiń bastamasy ǵana», deıdi Investbanq bas dırektory Oljas Jıenqul.
Osy mámile Investbanq úshin bir ǵana joba emes, kompanııa damytyp jatqan ekojúıelik baǵyttyń naqty nátıjege aınalǵanyn kórsetedi. Astana Hub qatysýshysy retinde Investbanq otbasylyq keńselerge, bankter men basqarýshy kompanııalarǵa arnalǵan JI-negizdi SaaS-sheshimder arqyly ınvestısııalyq prosesterdi avtomattandyryp, derekter taldaýy men klıentpen jumysty bir sıfrlyq ortaǵa biriktiredi. Endigi maqsat – Ońtústik-Shyǵys Azııa, MENA jáne Ortalyq Azııa arasyndaǵy kapıtal aǵymyn júıeli arnaǵa túsirip, qazaqstandyq bastamalardyń halyqaralyq ınvestorlarmen tıimdi ári ashyq formatta toǵysýyna jol ashý.
