Týrnır jeke esepte shveısarııalyq júıe boıynsha uıymdastyrylyp, eki formatty qamtydy – «klassıka» jáne «blıs». Jarystyń negizgi maqsaty – ulttyq murany ulyqtaý jáne 11-aqpanda Pavlodar qalasynda bastalatyn Qazaqstan chempıonatyna qatysatyn Almaty oblysynyń qurama komandasyna úmitkerlerdi irikteý.
«Chempıonat – uıymdastyrýshylyq jáne sporttyq deńgeıi joǵary deńgeıde ótti. Jyl saıyn básekeniń artyp, oıynshylardyń oıyny anaǵurlym kemeldenip kele jatqany qýantady. Mundaı jarystar sportshylarǵa qundy tájirıbe berip, ári qaraı damýǵa yntalandyrady», dedi jarystyń bas tóreshisi Erbolat Qylyshbaev.
Kúni boıyna ulasqan jarysta qatysýshylar joǵary daıyndyq deńgeıin, strategııalyq oılaý qabiletin jáne jyldam sheshim qabyldaı alý sheberligin kórsetti. Ásirese blıs partııalarynda zeıin men esepteý jyldamdyǵy aldyńǵy orynǵa shyqty.
«Ár partııa ońaı bolǵan joq, qarsylastar óte myqty boldy. Ásirese qatelikke jol berýge bolmaıtyn blıs formaty qıynǵa soqty. Barlyq jeńisterim – tynymsyz jattyǵýlar men bapkerimniń qoldaýynyń nátıjesi», dedi 15–17 jas aralyǵyndaǵy mektep oqýshylary arasynda toǵyzqumalaqtan tuńǵysh álem chempıony atanǵan Batyr Ernur.
Básekeli jarys qorytyndysynda jeńimpazdar baǵaly syılyqtarmen marapattaldy.
Almaty oblysy
