Endi básekelestikpen betpe-bet kelemiz

Elbasynyń Úndeýinen elimiz­­diń kásipkerlerine ákeniń balaǵa jany ashıtyndaı jaqyn­­­dyqty ári aldaǵy kezdesetin qıyndyqtardan saqtandyrý jaǵdaıyn uqtyq. Eshqandaı memleket kórpesiniń she­tin tuıyqtap, eshkimmen aralas­paı turmaıdy. Baılanyssyz sharýa­syn ońtaıynan keltire almaıdy. Qansha jerden tórt qubylasy teń memleket bolǵanymen, ishki jáne syrtqy naryqty rettemeı isi alǵa júrmeıdi. Memleket basshysy Qazaq­standy álemdegi ozyq elderdiń qataryna qosý úshin osy máseleni bizge jıi eskertip keldi. Biz erte me, kesh pe Dúnıejúzilik saýda uıymyna kiretinimizdi bildik. Memlekettik jeńildikterdiń jaqsylyǵyn sezingen saıyn alda úlken jaýapkershilik baryn uqtyq. Qorqatyn túk te joq. Muny men, áıel zaty, búgingi kúnniń tilimen aıtqanda sharýa qojalyǵynyń basshysy aıtyp turmyn. Sebebi, Úkimet óz tirligimdi ıkemdeımin degen azamattardyń qolyn qaqqan joq. Aýyl sharýashylyǵy salalaryna barynsha jeńildikter berdi. Qora salsaq, artezıan qudyǵyn qazsaq, shyǵarǵan aqshamyzdyń jartysyn tólep berdi. О́ndirgen ónimderdiń belgili bir paıyzyn moınyna kóterip aldy. Sonyń arqasynda jańa tehnologııalarǵa qol jetkizdik. Mysaly, meniń sha­rýashylyǵym kópsalaly. Saýyn sıyr, shaǵyn naýbaıhanam bar. Úlken taýyq fermasyn ashtym. Maldy soıatyn qasaphanany iske qosyp jatyrmyn. Rasy kerek, keı-keıde daıyn ónimderimizdi ótkizetin jer tappaı qınalyp qalamyz. О́ıtkeni, biz sııaqty shaǵyn jáne orta bıznes­pen aınalysatyn sharýashylyqtar kóp, tutynýshy az. Sondyqtan, endigi básekede sapasy joǵary, baǵa­sy tómen taýarlarǵa suranys artady. Basqa memleketterge qara­­ǵanda jerimiz keń, mal basyn ósi­rýge de, baý-baqsha ósirýge de qolaıly. Onyń ústine dúnıe­­júzinde azyq-túlikke tapshylyq qatty sezilip keledi. Sondyqtan, Dúnıe­­júzilik saýda uıymyna kirý biz­­diń sharýalarǵa qosymsha artyq­shylyqtar beredi dep oılaımyn.   Gúlsara SEIITJANOVA, «Jańa jer» sharýa qojalyǵynyń tóraıymy. Ońtústik Qazaqstan oblysy.