Memleket basshysy quryltaı ataýyn asa mańyzdy memlekettik ınstıtýttyń sımvoly retinde saqtap qalý týraly aıtty.
«Bolashaq Parlamenttiń ataýy boıynsha pikirimdi aıtsam. Quryltaı degen ataýdy berý kerek dep oılaımyn. Quryltaıdyń tarıhı aıasy da, maǵynasy da halqymyzǵa da jaqyn. Quryltaı otyrystaryn jańǵyrtý bastamasyn men ózim 2022 jyly kótergenmin. Osy baıandamanyń basynda quryltaı jumysynyń tıimdiligi men paıdasyna den qoıdym. Jalpy, elimizdiń saıası júıesinde Quryltaı ataýyn asa mańyzdy memlekettik ınstıtýttyń sımvoly retinde saqtap qalýymyz kerek dep oılaımyn», dedi Qasym-Jomart Toqaev.
Prezıdent depýtattar sanyna qatysty másele qyzý pikirtalas týǵyzǵanyn aıtty. Birinshi tarap elimizdegi halyq sanyna qaraı proporsıonaldy ýákildiń ıdesyn usynǵan. Al ekinshi tarap depýtat sanyn 500-ge deıin arttyrý qajet ekenin usynǵan.
«Bizdiń maqsatymyz − shyn máninde tıimdi ári kásibı Parlament qurý. Jańa zań shyǵarýshy organ eldegi aýqymdy ózgeristerge zańnamalyq turǵyda barynsha qoldaý kórsetýge tıis. Álemdegi ozyq tájirıbelerge qarasaq, bul úshin depýtat sanyn kóbeıtýdiń esh qajeti joq. Sondyqtan másele sanda emes, sapada. Eń bastysy Parlamentte naǵyz otanshyl azamattar, bilikti mamandar otyrýǵa tıis», dedi ol.
Qasym-Jomart Toqaevtyń aıtýynsha, jumys toby azamattardyń usynystaryn muqııat zerdelep, qyzý talqylaǵan. Olar Parlamenttiń mandat sany 145 bolýy kerek degen toqtamǵa kelgen. Jańa Parlamentte tóraǵanyń 3 orynbasary bolýy múmkin. Al komıtet sany 8-den aspaıdy.
Eske salaıyq, Qyzylordada Memleket basshysy Qasym-Jomart Toqaevtyń tóraǵalyǵymen Ulttyq quryltaıdyń V otyrysy ótip jatyr.
Jıynda Prezıdent neke ınstıtýtyn er men áıeldiń erikti odaǵy retinde zańnamalyq turǵydan bekitý týraly oıyn aıtty.
Kisi qolynan qaza tapqan Nuraıdyń basynda bolǵan jaǵdaıǵa da asa mán berdi.
Buǵan deıin Qasym-Jomart Toqaev Aral teńizi máselesine qatysty pikir bildirip, ony saqtaý búkil adamzat úshin ózekti mindet ekenin aıtqan bolatyn.
